Yevroittifoq Suriyaga qarshi sanksiyalarni yumshatishni boshladi

YeIga a’zo davlatlar tashqi ishlar vazirlar Suriyaga qarshi sanksiyalarni olib tashlashni nazarda tutuvchi yo‘l xaritasini kelishib oldi. Bu haqda Yevropa diplomatiyasi rahbari Kaya Kallas X ijtimoiy tarmog‘idagi sahifasi orqali ma’lum qildi.

Kallasning ta’kidlashicha, Yevropa Ittifoqi sanksiyalarni bekor qilishda «tezroq harakat qilishga intimoqda», ammo uning ogohlantirishicha, mamlakatning yangi hukumati «noto‘g‘ri qadamlar tashlasa» qaror qayta ko‘rib chiqilishi mumkin.

Kallas birinchi navbatda aynan qaysi sanksiyalar olib tashlanishiga oydinlik kiritmagan. Reuters o‘z manbalariga tayanib yozishicha, aviakompaniyalarga, jumladan, Syrian Arab Airlines’ga qo‘yilgan cheklovlar bekor qilinadi va neft eksporti taqiqi qayta ko‘rib chiqiladi.

Yevroittifoq Suriyaga qarshi sanksiyalarni 2012 yilda, Bashar Asad rejimi va isyonchi guruhlar o‘rtasida yuzaga kelgan fuqarolik urushidan keyin joriy etgan edi. Sanksiyalar asosan hukumat va harbiy tuzilmalarga qarshi yo‘naltirilgan. Ularga ko‘ra, Suriyaning Yevropadagi aktivlari muzatilgan, shuningdek, investitsiya va neft xaridiga cheklovlar qo‘yilgan.

Suriyani 50 yildan ortiq boshqargan Asadlar oilasi rejimi dekabr boshlarida qulab, prezident Bashar Asad Rossiyaga qochib ketdi. Mamlakat «Hay’at Tahrir ash-Shom» guruhi qo‘liga o‘tdi.

Avvalroq Suriyada Bashar Asad rejimi tarafdorlaridan qasos olish kampaniyasi doirasida yil boshidan buyon 91 ta qotillik qayd etilgani to‘g‘risida xabar berilgandi. Qarorgohi Londonda joylashgan Suriya inson huquqlari kuzatuv kengashiga ko‘ra, jami qurbonlar soni 190 nafar, jumladan, besh nafar ayoldan iborat. Eng ko‘p halok bo‘lganlar Xoms, Xama va Loziqiyada qayd etilgan.