Туркманистон ҳукумати давлат нашрлари устидан назоратни кучайтиришга қарор қилди, деб хабар берди «Озодлик» радиосининг туркман хизмати.
Қайд қилинишича, давлат ходимлари ва талабалар мамлакат президенти Сердар Бердимуҳамедов ва унинг оила аъзолари сурати туширилган «газета саҳифаларини сақлаб қолиш» ҳақидаги мажбуриятни имзолаган.
Нашр маълумотларига кўра, мансабдор шахслардан «расмли газета ва журналлар саҳифаларини сақлаб қолиш» талаб қилинган. Тақиқни бузганлик, масалан, газеталарни ўрама сифатида ишлатиш, олов ёқиш ёки ҳожатхона қоғози сифатида фойдаланиш оқибатида фуқаролар ишдан бўшатилиши мумкин.
Нашрнинг таъкидлашича, давлат хизматчилари ва талабалар ҳар йили давлат газета ва журналларига обуна бўлишга мажбурланади.
«Чегара билмас мухбирлар» ташкилотига кўра, Туркманистон матбуот эркинлиги рейтингида доимий равишда охирги ўринларда туради. 2024 йилда мамлакат 180 мамлакат ичида 175-ўринни эгаллади.
