“O‘zbekiston yozuvli pasportim uchun reysga qo‘yishmadi” – Wizz Air o‘zbek talabani bortga chiqarmagan

Work and Travel dasturi uchun Germaniyaga borgan o‘zbekistonlik talaba qaytishda Rim orqali Wizz Air reysiga chipta sotib olgan. Biroq aviakompaniya xodimi uning qo‘lidagi “O‘zbekiston” yozuvli pasportni ko‘rib, bortga qo‘ymagan. Oqibatda talaba 4 davlatda bir hafta sarson bo‘lib, zo‘rg‘a uyiga yetib keldi. Kun.uzʼga murojaat qilgan fuqaro aviakompaniyani Yevropa sudiga berishini bildirdi.

Wizz Air ustidan navbatdagi shikoyat. Work and Travel, ya’ni ishlash va sayohat dasturi uchun Yevropaga borgan O‘zbekiston Jahon tillari universiteti talabasi Suhrob Ubaydullayev Wizz Air’ni inson huquqlarini buzish, diskrinimatsiya, ayirmachilik va iste’molchilar huquqlarini buzishda ayblamoqda. Suhrobning aytishicha, Wizz Air xodimlari uni hech qanday sabab va tushuntirishlarsiz samolyot eshigidan ortga qaytarishgan. Buni izohlash, tushuntirishdan bosh tortishgan. Yaxshilikcha boshqa aviakompaniya orqali uchib ket, aks holda politsiyaga topshiramiz, ham deport qilinasan, ham muammong ko‘payadi, elchixonang ham senga yordam berolmaydi deb menga tahdid qilishdi, deydi talaba.

Uning aytishicha, voqea 2023 yilning avgusti oxirida bo‘lgan. Talaba Rim orqali Abu-Dabiga, Abu-Dabidan esa Samarqandga Wizz Air bilan uchishi kerak bo‘lgan. Rimdagi holat ortidan Suhrobning ikkinchi chiptasi ham kuyib ketgan. Nima qilishini bilmagan talaba qarz olib, Turkiyaga uchgan va Istanbulda bir necha kun boshpanasiz qolib ketgan.

“Qaytish biletini Italiya orqali olgandim. Ushbu aviakompaniya xodimlari meni diskriminatsiya qilishdi. Italiya hududidan ketayotganimda allaqachon pasportimga davlatdan chiqqanim haqidagi muhr urilgandi. Aviakompaniya xodimi esa samolyotning eshigi oldida mening qo‘limdagi pasportni ko‘rdi-da, sen O‘zbekiston fuqarosimisan, deya mendan chetga o‘tishimni so‘radi. Shu joyning o‘zida chiptamni bekor qilib yuborishdi va samolyotga mensiz uchib ketaverishini xabar qilishdi. Ular qo‘limdagi viza, chiptalar, viza va Germaniya bergan hujjatlarning birortasiga qarashmadi. Faqat pasportimdagi “O‘zbekiston” yozuvini ko‘rib, meni ushlab qolishdi” – Suxrob Ubaydullayev, talaba

Talaba o‘zaro suhbatimiz chog‘ida Turkiyada ham aldangani, uning pulini ba’zi yurtdoshlarimiz yordam beraman deb talon-toroj qilganini aytib berdi. Oila a’zolariga esa boshiga tushganlarini aytishga uyalgan, arzonroq chipta izlab Istanbuldan Rossiyaning Qozon shahriga uchuvchi reysdan bilet olgan.

"Yaqin kunlarda O‘zbekistonga reys bo‘lmagani uchun Turkiyada bir hafta qolib ketdim. Qiyinchiliklarga duch keldim, chiptaga to‘lasam, turar joyga, mehmonxonaga to‘lasam, chiptaga pulim yetmasdi. Uyimdagilarga esa bu haqida aytolmasdim, ular mendan xavotir olishlarini istamadim. Menga eng arzon bilet kerak edi. Bu esa Rossiyaning Qozon shahriga edi va Istanbuldan Qozonga uchdim. U yerda ham 1 kun aeroportda qolib, keyin O‘sh shahriga uchdim. O‘shdan esa uyimga – vodiyga yetib keldim”, - Suhrob Ubaydullayev, talaba

Suhrob Rimdan Istanbulga, Istanbuldan Qozonga, Qozondan O‘shga uchgan. O‘shdan esa mashinada Namanganga borishga majbur bo‘lgan. Uning aytishicha, birgina aviakompaniya xodimining ayirmachiligi ortidan yosh talaba o‘zga yurtlarda sarson bo‘lgan.

Xo‘sh, nega u endi o‘z noroziligini bildiryapti? Suhrob Ubaydullayevning aytishicha, o‘tgan muddat davomida u harakat qilgan, aviakompaniya sayti, pochtasiga bir necha marotaba xat yozgan. Vaziyatni tushuntirgan, kompensatsiya talab qilgan. Lekin birorta murojaat ijobiy yechib topmagan.

“Bir oy oldin aviakompaniya xodimlari aloqaga chiqdi va kompensatsiya to‘lanishi uchun mendan shaxsiy ma’lumotlarim, viza kartam raqamlarini oldi. Lekin shu bo‘yi ular yo‘q bo‘lib ketishdi. O‘zbekiston fuqarosi ekanman, o‘z haq-huquqlarimni talab qilaman. Vaziyat yuzasidan Yevropa sudiga murojaat qildim” – Suxrob Ubaydullayev, talaba

Suhrobning Kun.uzʼga taqdim etgan xatlari va yozishmalarida kelishicha, aviakompaniya xodimlari unga hech qanday kompensatsiya to‘lamasligini bildirgan.

Yana bir imeylda yozilishicha, aviakompaniya Suhrobning xatini qabul qilgan, biroq javob berishni istamagan. Wizz Air mijozi sifatida unga sabr tilangan. Holat yuzasidan yo‘lovchi Ubaydullayev Yevropadagi 1-2-huquq assotsiatsiyalariga xat yo‘llaganini, biroq ishni ko‘rib chiqishda rad javobini olayotganini aytadi.

Xo‘sh, nega O‘zbekiston fuqarolari oxirgi vaqtlar aeroportlarda juda ko‘p sarson bo‘lmoqda? Ayniqsa Abu-Dabi yo‘nalishiga uchayotgan yurtdoshlarimiz davomli qiyinchiliklarga duch kelayotgani, shunchaki sayohatga borganlar ham soatlab chegaradagi tekshiruvlarda qolib ketayotganidan noroziligini aytmoqda.

Shohrux Majidzoda tayyorladi.