Komil Allamjonovning yordamchilari Oliy sudda oqlandi

Prezident administratsiyasi sobiq mulozimi Komil Allamjonovga uyushtirilgan suiqasddan keyin qamoqqa olingan uning atrofidagi shaxslarga qo‘yilgan ma’muriy ayblovlar olib tashlandi.

7 nafar fuqaro mayda bezorilik va ichki ishlar xodimining qonuniy talablarini bajarmaslikda ayblanib, 15 sutka ma’muriy qamoq jazosiga hukm qilingan edi. Advokatga ko‘ra, ular asossiz ravishda qamalgan, ayblilikni isbotlovchi dalillar yo‘q va ishni ko‘rishda ko‘plab kamchiliklarga yo‘l qo‘yilgan.

Bu ishni Oliy sudda taftish tartibida ko‘rish 21 fevral kuni yakunlanib, sud qarori e’lon qilindi.

Qarorga ko‘ra, ma’muriy huquqbuzarlik hodisasini tasdiqlovchi dalillar yetarli bo‘lmagani sababli B.Yoqubov, S.Siddiqov, A.Qurbonmurodov, A.Tashov, A.Salimov, J.Turg‘unov va X.Zufarovga nisbatan chiqarilgan sud qarorlari bekor qilinib, ma’muriy huquqbuzarlikka oid ish MJtKning 271-moddasi 1-bandiga asosan tugatildi.

“Ish yuzasidan surishtiruv harakatlarini olib borishda huquqbuzarlik hodisasini tasdiqlovchi dalillarni to‘plash choralarini ko‘rmagan IIB xodimiga nisbatan Ichki ishlar vazirligiga, shuningdek ishni sudda ko‘rib chiqishda huquqbuzarlik hodisasini tasdiqlovchi dalillar yetarli emasligiga e’tibor bermagan sudyalarga nisbatan Sudyalar malaka hay’atiga xususiy ajrimlar chiqarish yo‘li bilan munosabat bildirildi”, – deyiladi Oliy sud axborotida.