Davlat teatrlarida ekspert guruhlari tashkil etiladi

Ekspert guruhlari – sahna asarlarining badiiy saviyasi, sahnaviy talqini yuzasidan taklif, tavsiyalar va xulosalar berish, shuningdek spektakllarda zo‘ravonlik yoki shafqatsizlikni hamda jins bo‘yicha kamsitishni targ‘ib qiluvchi sahna ko‘rinishlarini namoyish etish va ularni reklama qilishning oldini olish, sahnalashtirilayotgan asarlarni muhokama qilish, teatr-tomosha tadbirlarini o‘tkazishga ko‘maklashish uchun davlat teatrlari va teatr-studiyalarida tuziladigan maslahat organi hisoblanadi.

Ekspert guruhlari, qoida tariqasida, rais, uning o‘rinbosari, kotib va 9 nafargacha a’zo tarkibida shakllantiriladi.

Ekspert guruhlari tarkibi ixtisoslashuviga ko‘ra, qoida tariqasida, taniqli ijodkorlar, madaniyat xodimlari, olimlar va teatr sohasi mutaxassislari (teatrshunoslar, san’atshunoslar, bastakorlar, dirijyorlar, rejissyorlar, rassomlar, dizaynerlar, vokal artistlari, opera ijrochilari va boshqalar) orasidan shakllantiriladi va madaniyat vazirining buyrug‘i bilan tasdiqlanadi.

Tarixiy asarlarni sahnalashtirishda tegishli ekspert guruhlari tarkibiga sahna asarining mavzusi va yo‘nalishidan kelib chiqib, ushbu soha bo‘yicha malakali mutaxassislar qo‘shimcha jalb etilishi mumkin.

Har chorak yakunlari bo‘yicha bajarilgan ishlar natijadorligiga qarab ekspert guruhlari a’zolari MHTEKMning 5 baravarigacha miqdorda rag‘batlantiriladi. Bunda respublika ijro etuvchi hokimiyat organlari xodimlari ekspert guruhlari a’zoligiga qabul qilinganda, ularga rag‘batlantirish to‘lovlari amalga oshirilmaydi.