FNQZ xodimlari ikki oydan beri oyliksiz ishlayotganini aytishyapti

Farg‘ona neftni qayta ishlash zavodida ishchilarga oylik to‘lash bilan bog‘liq kechikishlar bo‘layotgani aytilyapti.

Kun.uz’ga murojaat qilgan FNQZ xodimining aytishicha, ularga 2 oydan beri ish haqlari to‘lanmayapti.

«3 mingdan ortiq ishchi bor, ikki oydan beri bizga oylik berishmayapti. Rahbariyat jim, nima bo‘layotganini hech kim bilmaydi. Aslida maoshlar ham oz, ammo biz oylikni oshirishni emas, uning o‘z vaqtida berilishini so‘rayapmiz xolos», deydi murojaatchi.

Boshqa bir xodim ham yuqoridagi ma’lumotni tasdiqladi va iyun oyidan beri oylik berilmayotganini aytdi.

Kun.uz bog‘langan FNQZ vakiliga ko‘ra, maoshlarni berishni boshlash rejalashtirilgan. Kechikishlarga kredit bilan bog‘liq muammo sabab bo‘lgani aytilyapti.

Avvalroq FNQZga egalik qiluvchi «Sanoat energetika guruhi» MChJga aloqador Eriell va Enter Engineering kompaniyalari xodimlari ham bir necha marotaba videomurojaat yo‘llab, oylik to‘lash bilan bog‘liq jiddiy muammolar borligini ma’lum qilgandi.

FNQZning xususiylashtirilishi

2022 yilning may oyida «Sanoat energetika guruhi» MChJ (Saneg) FNQZning 100 foiz ulushini ayrim majburiyatlar bilan 100 mln dollarga xususiylashtirib olgandi. Shundan keyin zavod 2023 yilda 469,6 mlrd so‘m, 2024 yilda esa 236,1 mlrd so‘m sof foyda ko‘rgan. Ammo hamon FNQZning 58,5 foiz nazorat paketi Davaktiv ixtiyorida qolayotganiga qaraganda, 3 yildan beri kelishilgan pul davlatga to‘liq to‘lanmagan. Bitim qachon yopilishi, to‘lov yana necha yilga cho‘zilishi ma’lum emas. Bu vaqtda Saneg zavodning bir qismini 140 mln dollarga sotishga ham erishdi. Saneg’da qarzga olingan zavodni qayta sotish huquqi bo‘lgan yoki bo‘lmagani ma’lum emas.