Janubiy Farg‘ona kanali suvini ifloslantirib kelgan korxona rahbari jarimaga tortildi. Ushbu masalaga oid huquqbuzarlik jinoyat ishlari bo‘yicha Xo‘jaobod tuman sudida ko‘rib chiqilgan.
Sudning 2025 yil 8 avgustdagi qaroridan ma’lum bo‘lishicha, Adbuvahob Matkarimov rahbarlik qilib kelgan “Nil-Granit” MChJ (“SAMO” brendi) tomonidan Janubiy Farg‘ona kanaliga chiqindi suvlari oqizib kelingan.
Qarorda keltirilishicha, korxonaning ishlab chiqarishidan chiqqan oqova suvlari uchun qurilgan lokal suv tozalash inshootining ishlash samaradorligini doimiy nazorat qilish belgilangan. Biroq bu inshoot qisman ishlayotgani ma’lum bo‘lgan. “Nil-Granit” MChJ rahbari A.Matkarimov avariyaviy holatdagi chiqindi suvlar tozalanmasdan korxona hududidagi maxsus ariq orqali Janubiy Farg‘ona kanaliga oqizishga yo‘l qo‘yib bergan.
Ushbu holat Andijon viloyati Ekologiya, atrof muhitni muhofaza qilish va iqlim o‘zgarishi boshqarmasi tomonidan 2025 yil 21 may kuni o‘tkazilgan o‘rganishda aniqlangan.
Adbuvahob Matkarimov Ma’muriy javobgarlik to‘g‘risidagi kodeksning 72-moddasi (suv resurslarini muhofaza qilish qoidalarini buzish) 1-qismida nazarda tutilgan huquqbuzarlikni sodir etganlikda aybli deb topilib, BHMning 5 baravari miqdorida, ya’ni 1 mln 875 ming so‘m jarima jazosi tayinlangan. Jarimani davlat foydasiga undirish belgilangan.
A.Matkarimov ishtirokisiz o‘tkazilishiga rozilik bildirib, ariza taqdim qilgani uchun sud ma’muriy ishni huquqbuzarning ishtirokisiz ko‘rib chiqqan.
Shu yil 26 iyul kuni Janubiy Farg‘ona kanalining Buloqboshi tumani Shirmonbuloq qishlog‘idan o‘tuvchi qismida quyuq oq ko‘pik oqqandi. Kun.uz ushbu holat yuzasidan surishtiruv o‘tkazganda suvchi – mirob Ilhom Buvayev Xo‘jabod tumanidagi “SAMO” trikotaj fabrikasidan chiqqan chiqindi suvlar kanal suviga qo‘shilib, doimiy ravishda ifloslantirishini bildirgandi.
“Tsellofan, ko‘mirga o‘xshagan qora rangdagi ximikat, ko‘pik oqadi. Kuzga borganda kanalda hech bir tirik zot qolmaydi. Baliqlargacha qirilib ketadi ximikat zahridan. Kanalda doimiy zahar oqaverib, faqat ilonbaliqlar qolgan. SAMO'dan buyog‘ida, aynan fabrikaning chiqindi suvi oqiziladigan qismidan boshlab qurbaqalar ham o‘lib ketgan. Tabiat jonzotlari qirilib bitdi xullas. Avvallari bu suvdan ichar edik. Chorvalar ichardi, hozir endi hatto tovuqlarga ham bermay qo‘ydik kanal suvini”, degan u.
