So‘rov: 59 foiz ukrainaliklar - Rossiya bilan murosa tarafdori

Ukrainaliklarning yarmidan ko‘pi (59 foiz) Rossiya o‘z mamlakatiga qarshi boshlagan urushni tugatish uchun harbiy harakatlarni to‘xtatish va Rossiya rahbariyati bilan murosa topish tarafdori. 31 avgust, yakshanba kuni e’lon qilingan «Reyting» (Rating Group) Ukraina sotsiologik guruhi so‘rovi natijalari shundan dalolat bermoqda.

Shu bilan birga, respondentlarning 20 foizi 2014 yilda Rossiya tomonidan egallab olingan Donbass va qo‘shib olingan Qrim Ukrainaga qaytarilguniga qadar harbiy harakatlar davom etishini qo‘llab-quvvatlashini bildirdi. Yana 13 foizi 2022 yil 23 fevral holatiga ko‘ra demarkatsiya chizig‘i yoki chegara o‘rnatish tarafdori bo‘lgan.

Respondentlarning 82 foizi muzokaralarni Rossiya bilan urushni tugatishning real usuli deb hisoblaydi, ulardan 62 foizi uchinchi davlatlar ishtirokida murosa topishni qo‘llab-quvvatlaydi, 20 foizi esa Kiyev va Moskva o‘rtasida to‘g‘ridan to‘g‘ri muzokaralar olib borishni talab qiladi.