Venesuelada fuqarolar uchun harbiy ko‘nikmalar kurslari o‘tkazildi

AQSh va Venesuela o‘rtasidagi ziddiyat kuchayib borayotgani va AQSh harbiylarining Karib dengizidagi kemalarga hujumlari fonida Karakas tinch aholini «Amerika imperiyasi» hujumi sodir bo‘lgan taqdirda «qo‘liga qurol olishga» va o‘z vatanini himoya qilishga chaqirdi.

Foto: EPA/Miguel Gutierrez

Venesuelada tinch aholi uchun keng ko‘lamli harbiy ko‘nikmalar kurslari bo‘lib o‘tdi. Ular mamlakat yetakchisi Nikolas Maduro buyrug‘i bilan AQSh kuchlari xalqaro suvlarda, Pentagon ma’lumotlariga ko‘ra, Venesueladan AQShga giyohvand moddalar olib ketayotgan kemaga yana hujum qilganidan keyin tashkil etilgan.

Nikolas Maduro «millionlab» tinch aholini «Amerika imperiyasi» tomonidan hujum uyushtirilgan taqdirda «qo‘liga qurol olishga» va o‘z vatanini himoya qilishga chaqirdi, deb yozadi AFP. Nashrning yozishicha, Karakasning Petare tumanida askarlar 30 nafar fuqarodan iborat guruhlarga qurol bilan qanday ishlash kerakligini ko‘rsatgani tufayli markaziy ko‘cha yopildi. O‘quv mashg‘ulotlaridan birinchi tibbiy yordam ko‘rsatish va «mafkuraviy fikrlash» kurslari ham o‘rin olgan.

Harbiy ko‘nikmalarga o‘rgatish kurslari Venesuelaning boshqa qismlarida, xususan, g‘arbiy San-Kristobal va Barinas shaharlarida ham o‘tkazildi.