Chinozda yuk poyezdining ikkita vagoni izdan chiqib ketdi

Toshkent viloyati Chinoz tumanida poyezd vagonlari relsdan chiqib ketdi. Bu haqda «O‘zbekiston temiryo‘llari» xabar berdi.

Ma’lum qilinishicha, 27 sentabr kuni soat 21:30 da Chinoz tumani «Rasulobod» MFY, Olmazor stansiyasi hududidagi Jizzax-Toshkent tovar poyezdining sut yog‘lari ortilgan ikkita vagoni relsdan chiqib ketgan. 

Hodisa oqibatida jabrlanganlar yo‘q.

Voqea joyiga tuman FVB rahbariyati, TBX navbatchi smenasi va tegishli xizmatlar jalb etilgan. Holat bo‘yicha surishtiruv ishlari olib borilmoqda. Hozirda poyezd harakati to‘liq tiklangan.

2024 yil may oyida Toshkent viloyatining Angren tumani hududida ham yuk vagonlari relsdan chiqib ketgandi. «Chirchiq savdo baraka» MChJga tegishli bo‘lgan shoxobcha temiryo‘lida xodimlari vagonlardan yuk tushirish vaqtida temiryo‘l qurilmasi «lebyodka» ishlash texnologiyasiga rioya qilmagani ma’lum bo‘lgandi.