Chinozda yo‘l-patrul xizmati xodimi YTH sodir qilgani aytilmoqda 

Ijtimoiy tarmoqlarda YPX xodimi ishtirokida YTH sodir bo‘lgani haqidagi xabarlar tarqaldi. Kun.uz holatga oydinlik kiritdi.

Ma’lum bo‘lishicha, YTH 2025 yil 12 avgust kuni soat 5:30 lar atrofida M-39 avtomobil yo‘lining Chinoz tumani hududidan o‘tgan qismida sodir bo‘lgan. 1987 yilda tug‘ilgan Fayzulla Ubaydullayev boshqaruvidagi Gentra mashinasiga yo‘lning qarama-qarshi yo‘nalishiga chiqib ketgan Cobalt kelib urilgan. Oqibatda Fayzulla Ubaydullayev og‘ir tan jarohati olib, shifoxonada vafot etgan.

Mashinada Fayzulla Ubaydullayevning turmush o‘rtog‘i va 3 nafar farzandi ham bo‘lgan. Ular Samarqand shahriga sayohatga borish maqsadida erta tongda yo‘lga chiqishgan. YTHda haydovchining ikki qizi hamda turmush o‘rtog‘i ham tan jarohati olgan.   

Marhumning yaqinlariga ko‘ra, Cobalt’ni yo‘l-patrul xizmati xodimi boshqarib kelayotgan bo‘lgan.

“Xodim Davron Yo‘ldoshev mashinani davlat raqamini yechib olgan holda katta tezlikda boshqargan. U o‘z yo‘nalishidagi mashinani noto‘g‘ri quvib o‘tishi oqibatida boshqaruvni yo‘qotib, qarama-qarshi yo‘nalishga chiqib ketgan va akamning mashinasiga kelib urilgan. So‘ngra 10-15 daqiqada yetib kelgan davlat raqami yechib olingan Damas mashinasiga o‘tirib, yordam ko‘rsatmasdan voqea joyidan qochib ketgan. O‘zi YPX xodimi bo‘la turib, bir vaqtning o‘zida shuncha qoidabuzarlik sodir qilishi mumkinmi?” deydi marhumning Kun.uz jurnalisti bilan suhbatlashgan ukasi. 

Hozirda holat yuzasidan jinoyat ishi qo‘zg‘atilib, tergov harakatlari olib borilmoqda.