Putin AZAL samolyoti halokatida Rossiya aybini tan oldi

Putin 2024 yil dekabr oyi oxirida «Ozarboyjon havo yo‘llari» aviakompaniyasining yo‘lovchi samolyoti halokatga uchrashida Rossiya javobgar ekanini tan oldi. Ozarboyjon poytaxti Bokudan Rossiyaning Grozniy shahriga parvoz qilgan Embraer E190 layneri ukrain dronlarining Chechenistonga hujumi tufayli yo‘nalishini o‘zgartirgan va Kaspiy dengizi uzra uchib, Qozog‘istonga yo‘l olgandi, ammo samolyot muvaffaqiyatsiz qo‘nishni amalga oshirgan, natijada bortda bo‘lganlardan 38 nafari halok bo‘lgan, faqat 29 kishi tirik qolgandi.

Ozarboyjon samolyotni Rossiya havo hujumidan mudofaa tizimi uchirgan raketa urib tushirganini da’vo qilib keladi. Moskva hodisa uchun aybini tan olishdan bosh tortgan, bu esa mamlakatlar o‘rtasida diplomatik mojaro keltirib chiqargandi. 9 oktyabr kuni ikki mamlakat rahbari Tojikiston poytaxti Dushanbe shahridagi sammit doirasida uchrashdi. Quyida Putinning ushbu uchrashuvdagi gaplari keltiriladi.

***

Uchrashuvimizni eng nozik mavzudan – osmonimizda yuz bergan aviatsiya fojiasidan boshlamoqchiman. O‘shandayoq, telefon orqali qilgan birinchi suhbatimizda fojia aynan Rossiya osmonida sodir bo‘lgani uchun nafaqat uzr so‘raganman, balki halok bo‘lganlarning oila a’zolariga ham samimiy hamdardlik bildirganman. Men bularning hammasini takrorlab, davom ettirib, shuni aytmoqchimanki, biz, albatta, kelishib olganimizdek, tergovga har tomonlama yordam beryapmiz.

Tergov jarayoni yakunlanmoqda va hozir bu fojianing sabablari haqida gapirish mumkin. U bir necha holatlar bilan bog‘liq. Birinchisi, fojia ro‘y bergan kuni Rossiya osmonida Ukraina dronlari bo‘lgan. Biz Rossiya chegarasini kesib o‘tgan uchta dronni bir vaqtning o‘zida kuzatganmiz.

Ikkinchi sabab – Rossiya havo hujumidan mudofaa tizimidagi texnik nosozliklar. Otilgan ikkita raketa samolyotga to‘g‘ridan-to‘g‘ri zarba bermadi, agar shunday bo‘lganida, u shu joyda yerga qular edi. Raketalar bir necha metr, taxminan o‘n metr masofada portladi... Laynerga raketaning zarba beruvchi elementlari emas, katta ehtimol bilan parchalari urilgan.

Aynan shuning uchun uchuvchi buni qushlar galasi bilan to‘qnashuv sifatida qabul qildi va bu haqda rossiyalik dispetcherlarga xabar berdi va bularning barchasi «qora qutilar»da qayd etilgan.

Unga Maxachqal’aga qo‘nishni taklif qilishgandi va bu ham «qora qutilar»da bor, yaxshi eshitilmoqda, lekin u baza aeroportiga, keyin esa Qozog‘istonga qaytishga qaror qildi. Shunga qaramay, fakt faktligicha qolaveradi.

Albatta, bunday fojiali holatlarda talab qilinadigan hamma narsa Rossiya tomonidan amalga oshiriladi, jumladan kompensatsiyalar bo‘yicha, shuningdek, barcha mansabdor shaxslarning xatti-harakatlariga huquqiy baho beriladi.

Umuman olganda, men asosan uchrashuvimiz arafasida, kecha, o‘tgan kuni bilgan narsalarimni bayon qildim. Hatto, rostini aytsam, bugun kechasi Moskvaga qo‘ng‘iroq qilib, qo‘shimcha tafsilotlar bor-yo‘qligini so‘radim. Men sizga bilganlarimning deyarli barchasini aytib berdim.