“Hamma shartli nom bilan hujjatlashtirilgan” – Rossiya armiyasiga yollangan namanganlik “Ded” ozodlikdan mahrum qilindi

Rossiya armiyasiga yollangan holda Ukrainaga qarshi urushda ishtirok etgan O‘zbekiston fuqarosi jinoiy jazoga tortildi. Kun.uz sud hujjati bilan tanishdi.

Sud hukmida keltirilishicha, Namangan shahrida yashovchi 1970 yilda tug‘ilgan R.K. 2023 yilning may oyida mavsumiy ishlash maqsadida Rossiyaga borgan. Patent olish maqsadida federal migratsiya xizmati idorasiga borganida FMX xodimlari unga patent berilmasligini, biroq Ukrainaga qarshi urushda ishtirok etsa Rossiya fuqaroligi berilishini hamda bemalol ishlashi mumkinligini aytgan.

R.K. 2023 yil iyun oyida urushga borish uchun o‘z hoxishiga ko‘ra Rossiya Qurolli kuchlari bilan bir yillik shartnoma imzolagan. Unga “Ded” laqabi berilgan. Erkak Ukrainaga qarshi urushda qatnashayotganligi uchun 700 ming rubl miqdorida bir martalik mukofot puli va har oy o‘rtacha 150-200 ming rubl oylik maosh olib kelgan. R.K. urushda haydovchi-mexanik bo‘lgan va Belgorod shahridagi harbiy qismda urush maqsadlarida foydalaniladigan harbiy transport vositalarini texnik ta’mirlash ishlari bilan shug‘ullangan.

R.K. sudda aybiga to‘liq iqrorlik bildirgan va urushga ozroq bo‘lsa-da pul topib, ro‘zg‘origa ishlatish maqsadida borganini aytgan.

“2023 yil may oyida ishlash uchun Sankt-Peterburg shahriga bordim. Shahardagi federal migratsiya xizmati idorasiga patent olish maqsadida murojaat qilganimda avval Rossiya hududida xuquqbuzarliklar sodir etganim uchun menga patent berilmasligini aytishdi. Ishlashim kerak, patent beringlar dedim. Shunda Rossiya qurolli kuchlari bilan shartnoma tuzishimni maslahat berishdi va bu orqali Rossiya fuqaroligini olishim mumkinligini ma’lum qilishdi. Men bu taklifga rozi bo‘ldim.

Sankt-Peterburg shahridagi Mudofaa ishlari bo‘limiga borib, Ukrainaga qarshi urushda ishtirok etish maqsadida shartnoma imzolash uchun ariza topshirdim. Faqat 50 yoshgacha bo‘lgan fuqarolar harbiy xizmatga olinayotganini, 50 yoshdan oshganlar esa front ortida xizmatga jalb etilayotganini bildirishdi. Oradan bir necha hafta o‘tgach Mudofaa ishlari bo‘limi xodimi aloqa chiqib, menga kamida 1 yil muddatga shartnoma tuzishni taklif qildi. 2023 yil 25 iyul kuni 1 yil muddatga shartnoma imzoladim.

Menga shaxsiy jiton raqami berildi. Yoshim katta bo‘lgani uchun “Ded” shartli nomi bilan hujjatlashtirishdi. U yerda hammaga alohida ism qo‘yib, hujjatlashtirishadi. O‘sha vaqtda menga 700 ming rubl mukofot puli berildi”, degan erkak suddagi ko‘rsatmasida.

Shundan so‘ng R.K. 2023 yil iyul-avgust oylarini Sankt-Peterburg shahridagi maxsus harbiy bazada boshqa yollanma harbiy xizmatchilar to‘planishini kutib o‘tkazgan. Shartnoma imzolagan yollanma harbiy xizmatchilar to‘plangach ular yoshiga qarab saralangan.

“2023 yil sentabr oylarida Belgorad shahridagi harbiy qismga yuborishdi. U yerda men haydovchi-mexanik sifatida ishladim. Xizmatim davomida menga 2 ming dollar miqdorida oylik maosh to‘langan. Pullar turmush o‘rtog‘im nomiga kelib tushardi.

2024 yil aprel oyining o‘rtalarida sog‘lig‘imdagi o‘zgarishlar tufayli Belgorad shahridagi ko‘p tarmoqli harbiy poliklinikaga murojaat qildim. Biroq u yerda maxsus shifokor bo‘lmagani sababli meni Sankt-Peterburg shahridagi harbiy gospitalga jo‘natishdi. 1 oy davomida “yurak ishemik” tashxisi bilan davolandim”, degan u.

R.K. 2024 yil iyun oyida O‘zbekistonga qaytib kelgan.

2025 yil aprel oyida Ukraina hukumatiga aloqador «Xochu jit» («Men yashashni xohlayman») loyihasi Rossiya armiyasi bilan shartnoma tuzib, Ukrainaga qarshi urushda qatnashgan 1100 kishi haqidagi ma’lumotlarni oshkor qilgandi. Ular Rossiya armiyasi safida harbiy harakatlarda qatnashayotgan yoki qatnashgan (halok bo‘lgan yoki shartnoma muddati yakunlangan) O‘zbekiston fuqarolari ekani aytilgan. Ro‘yxatga Ukrainaga asirga tushganlar kiritilmagan.

R.K. ana shu ro‘yxatdagi 1100 o‘zbekistonlikning biri bo‘lib chiqdi. U ro‘yxatda 392-raqamda, MT-891289 shaxsiy raqami ostida keltirilgan.

Jinoyat ishlari bo‘yicha Namangan shahar sudining hukmi bilan R.K. Jinoyat kodeksining 154-moddasi (Yollanish) 1-qismida nazarda tutilgan jinoyatni sodir qilganlikda aybli deb topilgan. Unga 2 yil muddatga ozodlikdan mahrum qilish jazosi tayinlangan. Jazoni umumiy tartibli koloniyalarda o‘tash belgilangan.

Avvalroq Rossiya armiyasiga yollangan navoiylik yigit 4 yil muddatga ozodlikni cheklash jazosiga tortilgandi. U harbiy bo‘linmaga boshiga qop kiydirilgan holda olib borilganini aytgan.