Mahmud Abbos G‘azo bo‘yicha «tinchlik sammiti»da ishtirok etadi

Falastin milliy ma’muriyati (FMM) rahbari Mahmud Abbos Misrning Sharm ash-Shayx shahrida G‘azo tinchlik bitimi imzolash marosimi bo‘ladigan «tinchlik sammiti»da ishtirok etadi. Bu haqda Axios muxbiri Barak Ravid o‘zining X sahifasida 12 oktyabr, yakshanba kuni manbaga tayanib xabar berdi.

«Falastin rasmiysi menga Falastin prezidenti Abbos ertaga Trampning Misrdagi tinchlik sammitida ishtirok etishni rejalashtirayotganini aytdi», — deb yozadi Ravid.

Axios'dan tashqari Misrning Al-Shorouk gazetasi ham manbalarga tayanib, Abbosning 13 oktyabr kuni bo‘lib o‘tadigan sammitda ishtirok etishi haqida xabar berdi. «Falastin prezidenti Mahmud Abbos ertaga Sharm al-Shayxdagi tinchlik sammitida ishtirok etadi», deb yozadi nashr ijtimoiy tarmoqdagi sahifasida.

11 oktyabr, shanba kuni Misr Tashqi ishlar vazirligi 13 oktyabr kuni Sharm ash-Shayxda xalqaro «tinchlik sammiti» o‘tkazish rejasini ma’lum qildi. Yig‘ilishda «G‘azodagi urushni tugatish bo‘yicha kelishuv» imzolanishi kutilmoqda. O‘tgan hafta Misrning ushbu shahrida Isroil va HAMAS o‘rtasidagi dastlabki kelishuv imzolangan edi.

TIV ma’lumotlariga ko‘ra, uchrashuvga AQSh va Misr prezidentlari Donald Tramp va Abdulfattoh as-Sisi hamraislik qiladi. Sammitda jami 20 ga yaqin dunyo yetakchilari, jumladan Buyuk Britaniya bosh vaziri Kir Starmer va Germaniya kansleri Fridrix Mers ishtirok etadi.

Ayni paytda Isroil va XAMAS imzolash jarayonida ishtirok etmaydi. Biroq, guruh sammit kuni ertalab isroillik garovga olinganlarni ozod qilishi kutilmoqda.