Kun.uz jurnalisti AQSh poytaxti Vashingtonda bo‘lib, qisqa muddatga keluvchilar uchun borish mumkin bo‘lgan ba’zi manzillarni bittta joyga to‘pladi. 3-4 kun bu shaharda bo‘lib, haqiqiy Vashington ruhini his qilish ko‘z bilan ko‘rish lozim bo‘lgan joylar anchagina, eng asosiysi - National Mall. Vashington yuragi hisoblangan bu manzilda deyarli barcha monumentlar joylashgan.
Vashington AQShning boshqa shtatlaridagi asosiy shaharlardan farqli o‘laroq osmono‘par, baland-baland binolari kam hudud. Dunyodagi eng kuchli davlatlardan birining poytaxti bo‘lgan Vashingtonni siz juda ham katta, aholisi ko‘p megapolis sifatida tasavvur qilishingiz mumkin. Lekin Vashington kichkina, uning hududi hattoki Toshkentdan ham kichik. Aholisi esa bor-yo‘g‘i 600-700 ming.
National Mall – Vashingtonning yuragi, shahar ramzlari joylashgan katta xiyobon. Vashingtonda bo‘ldim, degan hisni tuyish uchun birinchi navbatda National Mall'ga borish shart. Amerikaliklar bu yerni “Amerikaning old hovlisi” deb ham atashadi. Chunki yam-yashil zona, katta maydon – Potomak daryosigacha cho‘zilgan. Yodgorliklar, monumentlar – xullas shaharning qoq markazi. Butun Mallni aylanib chiqqani – bir necha soat yoki 1 kun vaqtingiz ketadi.
1-manzil – Vashington monumenti
Bu Amerika orzularining toshdan yasalgan timsoli. Qurilayotganda monumentga quyosh tushadi, u esa butun shaharni o‘z nuri bilan yoritib, o‘tgan asrlarning xotirasini so‘zlaydi, degan ideologiya bilan qurilgan. Bu monument birinchi prezident Jorj Vashington sharafiga bunyod qilingan.
Obelisk – hashamatdan yiroq, o‘ta sodda. Cho‘qqisida esa lotinchada – xudoga hamd, deya bitilgan. Amerikaliklar bu monumentni xayriya pullari evaziga qurishni boshlagan, lekin ishni davlat yakunlagan. Qurilish ishlari to‘xtab qolib, keyin davom etgani sabab – monument ikki xil rangda. Uni bugun Amerika bayroqlari bezab turadi.
Ikkinchi jahon urushi memoriali
2-manzil esa Vashington monumenti qarama-qarshisida joylashgan – Ikki jahon urushi memoriali. Obektga – jimlikdagi g‘alaba, deb ham ta’rif beriladi. 2004 yil ochilgan bu memorial urush faxriylariga ataladi. Markazdagi katta favvora atrofida 56 ta ustun qad ko‘targan. Ular urush davridagi AQShning 48 ta shtati va 7 hudud, District of Columbia’ni aks ettirgan. Har bir ustun esa millat birligining timsoli deya qaraladi.
Bu memorial bugun amerikaliklar va sayyohlar bilan gavjum. Vashingtonda namlik darajasi yuqori bo‘lgani uchun favvora atrofida o‘tirib, dam oladigan, salqinlaydiganlar ayniqsa shu kunlarda ko‘p. Favvora markazida esa 4000 yulduz bor, har bir yulduz 100 ta amerikaliklarni ifodalaydi, shunda jami 400 mingdan ortiq halok bo‘lganlar xotirasi bunda aks etgan.
