Qor qoploni rasman Qirg‘iziston milliy ramzi sifatida tan olindi

Qirg‘iziston Vazirlar Mahkamasi qor qoplonini (ilbars) mamlakatning milliy ramzi sifatida tan olish to‘g‘risida qaror qabul qildi.

Vazirlar Mahkamasi raisi Odilbek Qosimaliyev imzolagan hujjatda qor qoplonining rasmiy logotipini qabul qilish va uni qo‘llash tartibi ham nazarda tutilgan.

Qaror Qirg‘iziston prezidentining «Qor qoplonini Qirg‘iziston Respublikasining milliy ramzi sifatida tan olish to‘g‘risida»gi farmonini amalga oshirish doirasida Qirg‘izistonning tabiiy va madaniy merosini aks ettiruvchi ramzlarni saqlash, muhofaza qilish va ommalashtirish maqsadida qabul qilingan.

Qirg‘iziston Respublikasi Tabiat resurslari, ekologiya va texnik nazorat vazirligiga qor qoploni populyatsiyasi va yashash hududini saqlab qolish bo‘yicha chora-tadbirlar rejasini tasdiqlash topshirildi.

Mulkchilik shaklidan qat’i nazar, barcha davlat organlari, fuqarolarning o‘zini o‘zi boshqarish organlari, tashkilot va muassasalar mazkur qarorga amal qilishi belgilab qo‘yildi.

Qor qoploni sayyoramizdagi eng go‘zal va noyob, mushuksimonlar oilasiga mansub yirik yirtqich hayvon bo‘lib, Markaziy Osiyo tog‘larida yashaydi. U Himolay, Pomir, Tyan-Shan, Hindikush va Oltoy yovvoyi tabiatining ramzidir.

Qor qoploni 12 mamlakatda uchraydi: Xitoy (jami populyatsiyaning taxminan 60 foizi yashaydi), Mo‘g‘uliston, Rossiya (Oltoy, Tuva, Sayan), Qozog‘iston, Qirg‘iziston, O‘zbekiston, Nepal, Hindiston, Pokiston, Afg‘oniston, Tojikiston, Butan.

Qor qoploni xalqaro Qizil Kitobiga «zaif tur» sifatida kiritilgan. Asosiy tahdidlar: brakonerlik (teri va suyak uchun), yashash joyini yo‘qotish (chorva mollarini boqish va yo‘l qurilishi tufayli), yovvoyi tuyoqlilar sonining kamayishi. Hozir u milliy bog‘lar va qo‘riqxonalarda faol qo‘riqlanmoqda.