Ball tizimi joriy etilgandan beri qariyb 115 ming haydovchiga jarima ballari qo‘llandi

Besh oy ichida 114 mingdan ortiq haydovchi YHQ buzgani uchun jarima ballari oldi. YTH umumiy soni 6 foizdan ko‘proq kamaydi, haydovchilar aybi bilan sodir bo‘lgan avariyalar esa 31,2 foizga qisqardi.

Foto: Kun.uz

Bu haqda Yo‘l harakati xavfsizligi xizmati matbuot xizmati rahbari Zoir Yo‘ldoshev ma’lum qildi. Uning ta’kidlashicha, jarima ballar tizimi amaliyotda samara bergani kuzatilmoqda — shuncha miqyosdagi ijobiy dinamika avval qayd etilmagan.

YHQ buzilishi uchun ballar qo‘llash tizimi O‘zbekistonda 2025 yil 1 iyundan rasman ishga tushirilgan. Loyihaning dastlabki uch oyidayoq 60 mingdan ortiq haydovchiga qoidalarni buzgani uchun ballar yozilgan.

Hozircha ballar faqat YHX xodimlari tomonidan joyida qayd etilgan qonunbuzilishlar uchun berilyapti. Keyingi yildan e’tiboran yo‘llardagi videokameralar qayd etgan qoidabuzarliklar uchun ham ball qo‘llash rejalashtirilgan.