Internetda 600 nafar fuqaroni aldagan guruh qo‘lga olindi: 1 mlrd so‘mdan ortiq pul o‘zlashtirilgan

Toshkent viloyati IIBB «Axborot sohasidagi jinoyatlarga qarshi kurashish boshqarmasi» tezkor tekshiruvi natijasida Ohangaron tumanida yashovchi, 2005 yilda tug‘ilgan fuqaro B.N. va uning uch nafar sherigi ushlandi. Ular Telegram messenjeri va Instagram’da “limitlash xizmati” nomi bilan sahifa ochib, mikromoliya tashkilotlari ajratgan kredit limitlarini naqdlashtirishni va’da qilgan.

Gumondorlar o‘zlari ro‘yxatdan o‘tkazgan tadbirkorlik sub’yekti orqali onlayn savdo platformalarida faoliyat yuritib, taxminan 600 nafar fuqaroning ishonchini suiiste’mol qilgan va jami 1 mlrd 32 mln so‘m mablag‘ni o‘zlashtirgani aniqlandi.

Holat yuzasidan ushlangan shaxslarga nisbatan Jinoyat kodeksining 168-modda 4-qismi “a” bandi (firibgarlik) bilan jinoyat ishi qo‘zg‘atilib, “qamoqqa olish” tarzidagi ehtiyot chorasi qo‘llandi. Hozirda yetkazilgan moddiy zararni undirish choralari ko‘rilmoqda, dastlabki tergov harakatlari boshlangan.

Viloyat miqyosida noyabr oyi «Kibermadaniyatni yuksaltirish oyligi» deb e’lon qilingan bo‘lib, profilaktika va targ‘ibot ishlari kuchaytirilgan. Ma’lumotlarga ko‘ra, joriy yilning o‘tgan 10 oyida viloyatda sodir etilgan umumiy jinoyatlarning 44 foizini kiberjinoyatlar tashkil etgan. Asosiy usullar: zararli havolalar orqali karta/akkauntni qo‘lga kiritish, oldindan to‘lov talab qiladigan soxta bitimlar, soxta kriptobirjalar, o‘zgalar nomiga onlayn kredit olish, telefon qo‘ng‘iroqlari orqali aldov.

Kiberxavfsizlik bo‘yicha qisqa tavsiyalar:

• «limitni naqdlash», «oson daromad» takliflariga ishonmang;
• pul o‘tkazishdan oldin ustuvor tarzda huquqiy sub’yektni tekshiring;
• noma’lum havolalarga bosmang, autentifikatsiya kodlarini hech kimga aytmang;
• shubhali holat haqida IIBB yoki “102”, kiberxavfsizlik xizmatlariga xabar bering.