LOT Polish Airlines Samarqandga yangi aviaqatnov ochish masalasini ko‘rib chiqmoqda

“Dunyo” muxbiri xabariga ko‘ra, O‘zbekistonning Polshadagi elchisi Amirsaid A’zamxo‘jayev LOT Polish Airlines prezidenti Mixal Fiyol bilan uchrashuv chog‘ida ikki mamlakat o‘rtasidagi aviaaloqalarni rivojlantirish masalalarini ko‘rib chiqdi.

Muloqot davomida aviakompaniya rahbari O‘zbekiston Polsha uchun tobora muhim turizm va tranzit yo‘nalishiga aylanib borayotganini ta’kidladi. 2024 yil mart oyida elchixona ko‘magida yo‘lga qo‘yilgan va hozirda haftasiga 4 marta amalga oshirilayotgan Varshava – Toshkent – Varshava yo‘nalishidagi to‘g‘ridan to‘g‘ri reyslar yuqori talabga ega ekani qayd etildi.

Ma’lumotga ko‘ra, 2024 yil yakuni bo‘yicha mazkur yo‘nalishda 75 mingdan ortiq yo‘lovchi tashilgan. Bu Markaziy Yevropa va Polsha aviabozorida O‘zbekistonga bo‘lgan qiziqish ortib borayotganining yaqqol isboti sifatida e’tirof etildi.

Uchrashuvda tomonlar ikki mamlakat aviatsiya idoralari o‘rtasidagi amaldagi bitim doirasida Varshava–Toshkent reyslari sonini yaqin kelajakda har kunlik rejimigacha ko‘paytirishga kelishib oldi. Shuningdek, LOT Polish Airlines tomonidan Samarqand shahriga yangi yo‘nalish ochish imkoniyatlari tahlil qilindi.

Muloqot chog‘ida Uzbekistan Airways va LOT Polish Airlines o‘rtasidagi hamkorlikni yangi bosqichga olib chiqish, jumladan, Codeshare kelishuvini imzolash, kargo tashuvlar sohasida sheriklikni kengaytirish, birgalikda marketing va targ‘ibot tadbirlarini amalga oshirish bo‘yicha onlayn muzokaralar o‘tkazishga kelishib olindi.

Tomonlar mazkur tashabbuslar O‘zbekiston–Polsha o‘rtasidagi turistik, biznes va tranzit oqimlarini yanada oshirishga xizmat qilishiga ishonch bildirdi.