Prezident superkompyuter klasterlari va data-markazlar soni oshirilishini ma’lum qildi

Davlat rahbarining ta’kidlashicha, kelgusi 5 yilda 150 milliard dollardan ziyod xorijiy investitsiyalar jalb etish rejalashtirilgan. Ushbu mablag‘lar hisobidan minglab sanoat va infratuzilma obektlari barpo etilib, yuqori daromadli yangi ish o‘rinlari yaratiladi.

Aholi uchun qulay shart-sharoit yaratish doirasida “Yangi O‘zbekiston” massivlari va boshqa hududlarda 800 mingdan ortiq xonadonli, energiya tejamkor ko‘p qavatli uy-joylar qurilishi ko‘zda tutilgani qayd etildi. Bu nafaqat yangi turar joylar, balki zamonaviy infratuzilma, ijtimoiy obektlar va xizmatlar rivojini ham ta’minlaydi.

Shu bilan birga, axborot texnologiyalari, sun’iy intellekt va “buyumlar interneti” (IoT) kabi yangi yo‘nalishlarda faoliyat yuritayotgan kompaniyalar uchun jozibador muhit yaratish maqsadida zamonaviy superkompyuter klasterlari va data-markazlar sonini ko‘paytirish vazifasi qo‘yildi. Bu raqamli iqtisodiyot, elektron hukumat, ishlab chiqarishda raqamlashtirish va innovatsion servislarni jadal rivojlantirishga xizmat qilishi ta’kidlandi.

Ayni paytda Saudiya Arabistonining “Data-volt” kompaniyasi 3 milliard dollarlik investitsiya hisobidan quvvati 500 megavatt bo‘lgan yirik data-markaz qurish ishlarini boshlagani ma’lum qilindi. Bunday keng ko‘lamli raqamli infratuzilma loyihalari yurtimizdagi IT-tarmoq, autsorsing xizmatlari, ma’lumotlar saqlash va qayta ishlash markazlarini rivojlantirish uchun katta imkoniyatlar yaratadi.

Prezident ta’kidlaganidek, bunday sanoat, uy-joy va raqamli infratuzilma loyihalari amalga oshirilishi natijasida elektr energiyasiga bo‘lgan talab va ehtiyoj kamida 1,5 barobarga oshadi. Shu bois, energetika quvvatlarini yanada kengaytirish, “yashil” energiya ulushini ko‘paytirish va tarmoqlarni modernizatsiya qilish bo‘yicha rejalar izchil davom ettirilishi qayd etildi.