Qoraqalpoq o‘tovi YuNeSKO nomoddiy madaniy merosining Reprezentativ ro‘yxatiga kiritildi

Hindiston poytaxti Nyu-Dehlida bo‘lib o‘tayotgan YuNeSKO Nomoddiy madaniy merosni muhofaza qilish bo‘yicha hukumatlararo qo‘mitasi sessiyasida qoraqalpoq o‘tovi Insoniyat nomoddiy madaniy merosining Reprezentativ ro‘yxatiga rasman kiritildi. Shu tariqa, O‘zbekiston madaniy merosining YuNeSKO ro‘yxatlariga kiritilgan elementlari soni 17 taga yetdi.

Foto: “Dunyo” AA

Bu nominatsiya Qozog‘iston, Qirg‘iziston va O‘zbekiston tomonidan “Qirg‘iz, qozoq va qoraqalpoq o‘tovlarini tayyorlash bo‘yicha an’anaviy bilim va ko‘nikmalar” nomi ostida qo‘shma tarzda taqdim etilgan edi.

Qoraqalpoq o‘tovi ko‘chmanchi turkiy xalqlar uyining noyob namunasi sifatida xalqning dunyoqarashi, mehnat va turmush tarzi, mehmondo‘stligi, estetik qarashlari hamda milliy me’morchiligi uyg‘unlashgan madaniy ramz sifatida e’tirof etildi.

Qoraqalpoq o‘tovining YuNeSKO ro‘yxatiga kiritilishi Qoraqalpog‘iston uchun ham, umuman O‘zbekiston uchun ham katta ijtimoiy-siyosiy va ma’naviy ahamiyatga ega ekani ta’kidlanmoqda.

Mazkur qaror so‘nggi yillarda O‘zbekiston va YuNeSKO o‘rtasida madaniy merosni muhofaza qilish va targ‘ib etish sohasida izchil rivojlanayotgan hamkorlikning navbatdagi samarasi bo‘ldi.