SSV “Elektron retsept” tizimini joriy etish bo‘yicha qo‘shimcha tushuntirish berdi

SSV tashabbusi bilan vazirlikda davlat va xususiy tibbiyot tashkilotlari shifokorlari, tegishli idoralar va soha ekspertlari ishtirokida uchrashuv o‘tkazildi. Muloqot davomida “Elektron retsept” tizimini takomillashtirish, tibbiyot xodimlari tajribasi va bemorlar ehtiyojlarini hisobga olgan holda ayrim tartib-taomillarni yanada yaxshilash bo‘yicha takliflar muhokama qilindi. 

SSV bildirishicha, mutaxassislar o‘rtasida doimiy muloqotni yo‘lga qo‘yish maqsadida vazirlik huzurida Ekspertlar kengashini tashkil etish to‘g‘risida qaror qabul qilindi. Kengashning ochiq yig‘ilishlari har juma kuni o‘tkazilishi belgilangan. 

Uchrashuvda tizimning amaldagi ishlash mexanizmi yuzasidan ham tushuntirish berildi. Ta’kidlanishicha:

xususiy tibbiyot tashkilotlari va shifokorlarni “Elektron retsept” moduliga ulash bepul amalga oshiriladi; 
retsept (shu jumladan elektron retsept) yozish faqat shifokor vakolatiga kiradi; 
dorilar dorixonalarda elektron retsept, QR-kod yoki bemorning JShShIRi asosida berilishi qayd etildi. 

Aholiga qulaylik yaratish uchun SSV huzurida 24/7 rejimida ishlaydigan 1003 qisqa raqamli Call-markaz faoliyat yuritmoqda. Vazirlikka ko‘ra, fuqarolar ushbu raqam orqali “Elektron retsept” tizimi bo‘yicha maslahat va tushuntirish olishi mumkin. 

Muhokamalar yakunlari bo‘yicha “Elektron retsept” tizimini joriy etishning keyingi bosqichlarini belgilaydigan vazirning tegishli buyrug‘i qabul qilingani ma’lum qilindi. Xususan, birinchi bosqichda ayrim toifadagi dori vositalari (jumladan, tizimli ta’sirga ega antibiotiklar va boshqalar) uchun elektron retsept majburiy bo‘lishi, tizim to‘liq joriy etilgunga qadar va favqulodda vaziyatlarda ayrim holatlarda qog‘oz retsept imkoniyati saqlanishi kabi masalalar belgilangan.