Tailand va Kambodja jangovar harakatlarni davom ettirmoqda

Tailand va Kambodja o‘rtasida bir hafta oldin boshlangan jangovar harakatlar yakshanba kuni, 14 dekabrda ham davom etdi. Tailand Mudofaa vazirligi matbuot kotibining aytishicha, Kambodja qirollikning bir qator chegaradosh viloyatlarini o‘qqa tutgan va bombardimon qilgan. O‘z navbatida, Kambodja Mudofaa vazirligida bildirilishicha, yarim tundan keyin Tailand ushbu davlat hududini minomyot snaryadlari va bombalar bilan o‘qqa tutgan.

Shu bilan birga, Kambodja bilan chegaradosh Tailandning qator viloyatlarida soat 19:00 dan 05:00 gacha komendantlik soati joriy etildi. Bir kun oldin Kambodja Tailand bilan chegaradan o‘tish punktlarini yopgan.

AQSh prezidenti Donald Tramp 12 dekabr kuni Tailand va Kambodja bosh vazirlari — Anutxin Chanvirakun va Xun Manet bilan telefon orqali muzokara o‘tkazgan. Shundan so‘ng u har ikki mamlakat o‘sha kunning o‘zi — 12 dekabrdan boshlab barcha jang harakatlarini to‘xtatishga kelishib olganini aytgan.

Biroq suhbat yakunlari bo‘yicha bayonotlarida na Anutxin, na Xun bunday kelishuv haqida tilga olgan. Tailand bosh vaziri esa otashkesim bo‘yicha kelishuv mavjudligini ochiq rad etgan. «Tailand mamlakatimiz va aholimiz uchun tahdid va xavf yo‘qolganini his qilmaguncha, harbiy harakatlarni davom ettiradi», — deb yozgan u Facebook’da.

Kambodja hukumati rahbari o‘zining Facebook’dagi postida Tramp bilan suhbatni eslagan, ammo mamlakati oktyabrda Kuala-Lumpurda imzolangan kelishuv asosida tinch yechim izlashda hali ham davom etayotganini bildirgan.

Chegara bo‘yicha bahs bilan bog‘liq, o‘nlab yillardan beri davom etib kelayotgan Kambodja va Tailand o‘rtasidagi qarama-qarshilikning navbatdagi kuchayishi dushanba kuni, 8 dekabrda boshlandi. Tomonlar chegaraning turli uchastkalarida raketa va artilleriyadan foydalangan holda jang harakatlarini qayta tikladi. Rasmiy ma’lumotlarga ko‘ra, 14 dekabr holatiga kelib har ikki tomondan kamida 25 kishi halok bo‘lgan, jumladan 14 nafar tailandlik harbiy va 11 nafar kambodjalik tinch aholi vakili.

Iyul oyidagi avvalgi keskinlashuvdan keyin — o‘shanda besh kunlik janglarda 40 nafardan ortiq kishi halok bo‘lgan va taxminan 300 000 nafar tinch aholi o‘z uyini tark etishga majbur bo‘lgan — AQSh vositachiligida otashkesimga erishilgan edi. Oktyabr oxirida Kambodja va Tailand bosh vazirlari deklaratsiya imzolab, unda «keskinlikni pasaytirish, ishonchni tiklash va o‘zaro manfaatli munosabatlarga ko‘maklashish» majburiyatini olgan.

Biroq noyabr oyida Tailand bu kelishuvni bajarishdan chekingan: Bangkok ma’lumotiga ko‘ra, chegaradosh hududda mina portlashi natijasida ikki nafar tailandlik askar halok bo‘lgan. Shu tariqa Tailand Kambodjani otashkesim rejimi buzilganida ayblagan.