Harbiylar Sumi viloyatidan Rossiyaga 50 nafar tinch aholini majburan olib ketdi

Rossiya harbiylari Ukraina Sumi viloyatidagi Krasnopol jamoatiga qarashli Grabovskoye qishlog‘ining 50 nafar fuqarosi — tinch aholini — majburan Rossiya hududiga olib ketgan. Bu Ukraina tashqi ishlar vaziri Andrey Sibixaning 21 dekabr, yakshanba kuni X mikroblogida e’lon qilingan postida keltirilgan ma’lumotdan ma’lum bo‘lmoqda.

Uning ma’lumotiga ko‘ra, Rossiyaga olib ketilgan tinch aholi orasida asosan keksa ayollar ko‘pchilikni tashkil qiladi. Bundan oldin Birlashgan kuchlar guruhi kommunikatsiyalar bo‘limi boshlig‘i Viktor Tregubov Grabovkadan olib ketilgan 50 nafar aholining aksariyati fuqaro erkaklar bo‘lganini aytgan edi. OAV xabarlaridan kelib chiqib, gap qishloqni tark etmay qolgan aholi haqida ketmoqda.

“Biz fuqarolarimiz — garovga olingan tinch aholi uyiga qaytarilishini talab qilamiz. Ushbu 50 nafar odam va Rossiyaga majburan deportatsiya qilingan minglab boshqa tinch aholi, jumladan ukrain bolalari ham”, — deb yozdi Sibixa. Shu bilan birga, Ukraina diplomatiyasi rahbari barcha davlatlar va xalqaro tashkilotlarni Kiyevning “uylaridan olib qochilgan aybsiz tinch fuqarolarni” vatanga qaytarish talabini qo‘llab-quvvatlashga chaqirdi.

U buni harbiy jinoyat deb atab, hodisa Ukrainada allaqachon tergov qilinayotganini va xalqaro darajada munosib munosabat bo‘lishi kerakligini ta’kidladi.

Shu kuni Ukraina ombudsmani Dmitriy Lubinets Telegram’da RF Qurolli kuchlari xizmatchilari Sumi viloyatidan 50 nafar Ukraina fuqarosini majburan Rossiya hududiga olib ketganini xabar qildi.

“Dastlabki ma’lumotlarga ko‘ra, 18 dekabr kuni Rossiya Federatsiyasi Qurolli kuchlari xizmatchilari Sumi viloyatidagi Grabovskoye qishlog‘ining 50 nafarga yaqin tinch aholisini noqonuniy ushlab qolgan, ularni aloqa vositalariga kirish imkoniyatisiz va munosib shart-sharoitlarsiz saqlagan, 20 dekabr kuni esa majburan Rossiya hududiga olib chiqib ketgan”, — deyiladi postda.

“Bunday harakatlar xalqaro humanitar huquqning qo‘pol buzilishi hisoblanadi: bu — urush qonun-qoidalarini buzish, noqonuniy ravishda erkinlikdan mahrum qilish va tinch aholini majburan deportatsiya qilishdir”, — deb ta’kidladi Lubinets.

U qo‘shimcha qilishicha, RFdagi inson huquqlari bo‘yicha vakilga murojaat qilib, noqonuniy deportatsiya qilingan Ukraina fuqarolarining qayerda ekani haqida ma’lumot berishni, ular saqlanayotgan sharoitlar va birinchi navbatdagi ehtiyojlarini xabar qilishni, shuningdek ularni zudlik bilan Ukrainaga qaytarish bo‘yicha chora ko‘rishni talab qilgan. Bundan tashqari, Lubinets Rossiyaga deportatsiya qilingan ukrainlar masalasi bo‘yicha Xalqaro Qizil Xoch Qo‘mitasiga ham xat yo‘llaganini ma’lum qildi.

Shuningdek, u ukrain qonun chiqaruvchilarini “hech bo‘lmaganda, hayoti va erkinligiga bevosita tahdid mavjud hududlardan bolalarni” majburan evakuatsiya qilish haqida qonun qabul qilishga chaqirdi.

RF Mudofaa vazirligining Telegram’dagi 20 va 21 dekabr kunlariga oid xabarlarida Grabovskoye nomi tilga olinmagan. Ushbu ukrain qishlog‘i Rossiyaning Belgorod viloyatiga yaqin joylashgan. Urush boshlanishidan oldin u yerda taxminan 700 kishi istiqomat qilgan.