“Vatan himoyasi - sharafli va mas’uliyatli burch” - Prezident tabrigi

O‘zbekiston prezidenti, Qurolli kuchlar oliy bosh qo‘mondoni Shavkat Mirziyoyev O‘zbekiston Qurolli kuchlari tashkil etilganining 34 yilligi va Vatan himoyachilari kuni munosabati bilan bayram tabrigi yo‘lladi.

Davlat rahbari tabrigida askar va serjantlar, ofitser va generallar, shuningdek, Qurolli kuchlar faxriylarini samimiy muborakbod etib, vatan himoyasidek sharafli va mas’uliyatli ishga hayotini bag‘ishlagan yurt posbonlariga yuksak hurmat va ehtirom bildirdi. Shu bilan birga, vatan oldidagi burchini bajarish chog‘ida mardlarcha halok bo‘lgan qahramonlar xotirasiga chuqur ehtirom izhor etildi.

Prezident Yangi O‘zbekistonni barpo etish yo‘lida amalga oshirilayotgan tarixiy o‘zgarishlarda Qurolli kuchlarning munosib hissasi borligini ta’kidladi. Davlat rahbari harbiylarni buyuk ajdodlar an’analarining shonli davomchilari sifatida e’tirof etib, vatanga fidoyi, jangovar saflarda doimo hushyor bo‘lgan azmu shijoat sohiblari bilan faxrlanishini bildirdi.

Tabrikda keyingi yillarda “O‘zbekiston – 2030” strategiyasi doirasida Qurolli kuchlarning harbiy qudratini oshirish, boshqaruv va ta’minot tizimini takomillashtirish, qo‘shinlarning jangovar salohiyatini kuchaytirish bo‘yicha keng ko‘lamli ishlar amalga oshirilayotgani qayd etildi. Jumladan, zamonaviy axborot texnologiyalari asosida modernizatsiya ishlari olib borilayotgani, qo‘shinlar saflari yangi ta’lim va tarbiya olgan malakali ofitser va serjantlar bilan to‘ldirilayotgani aytildi.

Shuningdek, shaxsiy tarkibning kasbiy, intellektual va ma’naviy salohiyatini yuksaltirish, armiyani zamonaviy qurol-yarog‘ va harbiy texnika bilan bosqichma-bosqich ta’minlash ishlari davom etayotgani ta’kidlandi. Prezident yoshlar o‘rtasida harbiy xizmatga qiziqishni oshirish, ularni vatanparvarlik ruhida tarbiyalash hamda xalq bilan armiya o‘rtasidagi birlik va jipslikni mustahkamlashga qaratilgan ishlar qat’iy davom ettirilishini bildirdi.

Davlat rahbari nutqida xalqaro maydondagi murakkab geosiyosiy jarayonlarga to‘xtalib, mavjud vaziyatni hisobga olgan holda jang va boshqaruv usullarini zamon talablari asosida yangilash, yuqori malakali harbiy kadrlarni tayyorlash, harbiy xizmatchilarning jangovar ruhi va jismoniy tayyorgarligini muntazam oshirish ustuvor vazifa bo‘lib qolishini qayd etdi.

Prezident, shuningdek, milliy armiyani zamonaviy qurol-yarog‘, jumladan, sun’iy intellekt asosida robotlashtirilgan majmualar bilan ta’minlash, qo‘shinlarni boshqarish va qaror qabul qilish jarayonlariga ilg‘or axborot texnologiyalarini keng joriy etishga doimiy e’tibor qaratilishiga urg‘u berdi.

Tabrik yakunida Shavkat Mirziyoyev harbiy xizmatchilar va ularning oila a’zolariga mustahkam sog‘liq, baxt-saodat va faoliyatlarida ulkan muvaffaqiyatlar tilab, vatan himoyasi yo‘lida tolmaslik va yutuq hamda zafarlar doimo yor bo‘lishini tiladi.