Germaniya Shoygu bayonotiga tayanib, Rossiyadan bo‘lgan dezertirga boshpana bermadi

Germaniyaning Migratsiya va qochqinlar ishlari bo‘yicha federal idorasi (BAMF) rossiyalik Georgiy Avalianiga boshpana berishni rad etdi. U Ukrainaga qarshi urushga “qisman safarbarlik” doirasida chaqirilgan va frontdan qochib ketgan. BAMF rad javobini shu bilan asoslaganki, Rossiyada safarbarlik 2022 yildayoq tugagan, demak, Avalianining hayotiga RFda xavf yo‘q. Bu haqda juma kuni, 23 yanvarda “Proshchay, Orujiye!” huquqni himoya qiluvchi loyihasining harbiy tahlilchisi Aleksey Alshanskiy X ijtimoiy tarmog‘idagi sahifasida xabar bergan.

Alshanskiy ma’lumotlariga ko‘ra, Avaliani 2022 yil sentabrda safarbar qilingan. Bir oy o‘tib u frontdan qochishga uringan, ammo ushlangan va “qiynoq yerto‘lasi” deb ataluvchi joyga tashlangan, u yerda bir necha hafta davomida unga azob-uqubat yetkazilgan: “tok, kaltaklash, otib tashlashni imitatsiya qilish”. Keyinroq Avalianini yana frontga qaytarishgan, ammo u hospitalga tushgan va o‘sha yerdan Rossiyaga chiqib ketishga hamda harbiylardan yana qochishga muvaffaq bo‘lgan. Biroq oxir-oqibat uni ikkinchi marta ham tutishib, harbiy qismga olib borishgan. Bir oydan keyin Avaliani uchinchi marta ham qochgan va bu safar RFdan chiqib ketgan.

Alshanskiyning aytishicha, dezertir ikki yil davomida qochqin holatida yashagan, shu vaqt ichida esa Rossiyada uning oilasi ta’qib qilingan. Avaliani Germaniyaga 2025 yilda yaqinlari bilan Xorvatiyadan kelgan. Aleksey Alshanskiy yozishicha, u yerda “boshpana olish imkoniyati yo‘q”.

Avalianining boshpana haqidagi arizasini ko‘rib chiqqan nemis idoralari rad javobini bergan va buni shunga bog‘lagan: 2022 yil oktyabrida RFning o‘sha paytdagi mudofaa vaziri Sergey Shoygu mamlakat prezidenti Vladimir Putinga safarbarlik yakunlangani haqida xabar qilgan. Alshanskiy so‘zlariga ko‘ra, rad javobini yozgan nemis amaldori Ukrainadagi Rossiya kuchlarida “qiynoq yerto‘lalari” mavjudligiga shubha qilgan va Georgiy Avaliani hamda uning oilasi Rossiyaga qaytganda ularga faqat 30 ming rubl (taxminan 330 yevro) miqdorida jarima tahdid qiladi, degan xulosaga kelgan.

Aleksey Alshanskiy fikricha, rad javobining matni BAMF Avalianining arizasini mohiyatan ko‘rib chiqmaganini, aksincha “barcha rossiyalik chaqiruvdan qochganlarga odatda beriladigan avtojavob”ni yuborganini ko‘rsatadi. Tahlilchi aytishicha, BAMF hatto harbiy xizmatchini fuqarodan ajrata olmagan. Huquq himoyachisi bildirishicha, endilikda Georgiy Avaliani GFRda boshpana olish uchun sud orqali kurashadi.

2022 yil 24 fevraldan 2026 yil 13 yanvargacha bo‘lgan davrda RFning Ukrainaga qarshi urushida kamida 163 606 nafar rossiyalik harbiy xizmatchining halok bo‘lgani tasdiqlangan. Bu 16 yanvar kuni e’lon qilingan, BBC rus xizmati va “Mediazona” nashri yangilagan ro‘yxatdan kelib chiqadi. Ushbu ro‘yxat ko‘ngillilar jamoasi ishtirokida ochiq manbalardagi ma’lumotlar asosida tuziladi.

Ma’lumotnomada Rossiya armiyasi va boshqa kuch tuzilmalaridagi 6300 dan ortiq ofitser (6302 nafar) halok bo‘lgani tasdiqlangani aytiladi. 2024 yil sentabriga kelib yo‘qotishlar soni bo‘yicha birinchi o‘ringa yana ko‘ngillilar (53 976 nafar, 33 foiz) chiqqan (shunga o‘xshash tendensiya 2022 yil yozi boshidan kuz o‘rtalarigacha ham kuzatilgan) — bu kumulyativ ta’sir natijasi ekani ta’kidlanadi. Shu vaqtga kelib qamoqxonalarda yollash keskin kamaygan, Rossiyada esa yangi safarbarlik e’lon qilinmagan.