Infarkt va insultning oldini olish bo‘yicha milliy dastur joriy etiladi

“O‘tkir yurak-qon tomir va tserebrovaskulyar kasalliklarning oldini olish chora-tadbirlarini takomillashtirish” yo‘nalishidagi tashabbuslarga ko‘ra, milliy dastur 2026 yil 1 maydan avvalambor Samarqand viloyati va Toshkent shahrida yo‘lga qo‘yiladi. Keyingi bosqichda, 1 oktyabrdan dastur Andijon, Namangan va Farg‘ona viloyatlariga kengaytiriladi. 2027 yildan esa uni boshqa hududlarda ham joriy etish ko‘zda tutilgan.

Milliy dastur doirasida quyidagi muhim yo‘nalishlar belgilangan:

• 30 yoshdan oshgan aholi o‘rtasida yillik skrining va maqsadli tibbiy tekshiruvlar: aholi orasida yiliga kamida bir marta so‘rov (survey) o‘tkazish va natijalarga ko‘ra xavf guruhlarida maqsadli ko‘riklarni tashkil etish;
• shoshilinch tibbiy yordamni “oltin soat” tamoyili asosida kuchaytirish: xalqaro standartlarga muvofiq infarkt va insult kabi holatlarda tezkor yordam ko‘rsatish vaqti bo‘yicha tartib-qoidalarni joriy etish;
• klinik marshrutlar (clinical pathways) va shoshilinch yordam algoritmlari: bemorlarni qabul qilishdan tortib davolashgacha bo‘lgan jarayonlarni standartlashtirish va amaliyotga kiritish;
• tez yordam brigadalarini raqamli uskunalar bilan jihozlash: telemetrik elektrokardiograf va monitorli defibrillyatorlar, shuningdek, EKG natijalarini sun’iy intellekt yordamida tahlil qilish va real vaqtda uzatish imkoniyatini yaratish;
• statsionarlarda raqamli yo‘l xaritalari va AI-diagnostika: insult diagnostikasida sun’iy intellekt elementlarini qo‘llash, bemor “yo‘nalishi”ni raqamlashtirish, zarur dori vositalari va materiallar bilan ta’minlash.

Rasmiy ma’lumotlarga ko‘ra, dasturni moliyalashtirish uchun 2026 yilda 239 mlrd so‘m, 2027 yildan boshlab har yili 280 mlrd so‘m ajratilishi qayd etilgan.