Xorazmda yangi ilmiy markaz: Ma’mun universiteti innovatsiya va ta’limni birlashtirmoqda

Xorazm viloyatida joylashgan Ma’mun universiteti so‘nggi yillarda nafaqat ta’lim, balki ilm-fan va innovatsiyalar sohasida ham faol rivojlanib bormoqda. Yaqinda universitet huzurida yangi Ilmiy-tadqiqotlar va innovatsion rivojlanish markazining zamonaviy binosi foydalanishga topshirildi.

Tantanali ochilish marosimida ishtirok etgan mutaxassislar mamlakatda ilm-fan va innovatsiyalarni qo‘llab-quvvatlash davlat siyosatida ustuvor yo‘nalishlardan biri ekanini ta’kidladilar.

Yangi markaz tarkibida iqtisodiyot, raqamli texnologiyalar, sun’iy intellekt, axborot texnologiyalari, tarix, tibbiyot va psixologiya kabi yo‘nalishlarda zamonaviy laboratoriyalar tashkil etilgan. Bu laboratoriyalar talabalarning nazariy bilimlarini amaliyot bilan uyg‘unlashtirish, shuningdek yosh tadqiqotchilarni ilmiy faoliyatga jalb etishga xizmat qiladi.

Mutaxassislar fikricha, markaz nafaqat ta’lim sifatini oshirish, balki ilm-fan va ishlab chiqarish o‘rtasidagi hamkorlikni kuchaytirishda ham muhim ahamiyat kasb etadi. Xorijiy ekspertlar ham universitetda yaratilgan sharoitlarni yuqori baholamoqda. Jumladan, rossiyalik professor Vladimir Kazlov bu yerda ko‘rgan ilmiy muhit va laboratoriyalar zamonaviy texnikalar bilan jihozlanganini ta’kidlab, bunday imkoniyatlar dunyoda kam uchrashini qayd etgan.

Ma’mun universiteti 2019 yilda davlat ro‘yxatidan o‘tgan bo‘lib, 2021 yildan rasmiy faoliyatini boshlagan. Universitet infratuzilmasiga 20 million AQSh dollari miqdorida investitsiya kiritilgan. Hozirgi kunda universitetda 12 500 nafardan ortiq talabalar tahsil olmoqda va ularga 248 nafar professor-o‘qituvchi ta’lim bermoqda. Ilmiy salohiyat darajasi 68,8 foizni tashkil etib, bu oliygohning ilmiy yo‘nalishdagi o‘sishini ko‘rsatadi.

Oliy ta’lim muassasasida 5 ta fakultet va 12 ta kafedra faoliyat yuritadi. Ta’lim o‘zbek, rus va ingliz tillarida olib boriladi. Shuningdek, talabalar uchun zamonaviy o‘quv binolari, elektron kutubxona, sport infratuzilmasi va talabalar turar joylari yaratilgan. Ilmiy faoliyat ko‘rsatkichlari ham e’tiborga loyiq: universitetda 48 ta darslik, 45 ta monografiya va 84 ta o‘quv qo‘llanma nashr etilgan. 800 dan ortiq ilmiy maqolalar esa xalqaro va respublika jurnallarida chop etilgan bo‘lib, ularning bir qismi Scopus va Web of Science bazalariga kiritilgan.

Universitet xalqaro hamkorlikka ham alohida e’tibor qaratmoqda. Yaponiya, Janubiy Koreya, Indoneziya, Turkiya va Ozarboyjon universitetlari bilan hamkorlik yo‘lga qo‘yilgan bo‘lib, talabalar almashinuvi va qo‘shma ta’lim dasturlari amalga oshirilmoqda.

Mutaxassislar fikricha, yangi tashkil etilgan ilmiy markaz va zamonaviy infratuzilma Ma’mun universitetini hududdagi innovatsion ta’lim va tadqiqot markazlaridan biriga aylantirishda muhim bosqich bo‘lib xizmat qiladi.

Ma’mun universiteti axborot xizmati

Reklama huquqi asosida