Denovda gaz quyish shoxobchasida portlash sodir bo‘ldi

Surxondaryo viloyati Denov tumanida joylashgan avtomobillarga suyultirilgan gaz quyish shoxobchasida portlash va yong‘in sodir bo‘ldi. Hodisa joyiga qutqaruv xizmatlari tezkor yetib borib, yong‘inni o‘rab oldi, bartaraf etish ishlari davom etmoqda.

Foto: Videodan kadr

Ma’lum qilinishicha, 7 aprel kuni soat 08:24 da «112» tizimi orqali Oqtom mahallasidagi gaz quyish shoxobchasida «KAMAZ» rusumli propan gaz tashuvchi maxsus avtomobildan sig‘imga gaz quyish vaqtida chaqnash yuz bergani haqida xabar kelib tushgan.

Qutqaruv bo‘linmalari hodisa joyiga soat 08:39 da yetib borib, yong‘in soat 08:42 da o‘rab olingan.

Dastlabki ma’lumotlarga ko‘ra, hodisaga texnologik jarayonning buzilishi sabab bo‘lgan bo‘lishi mumkin. Hozirda mutasaddi idoralar tomonidan voqea sabablari o‘rganilmoqda.