“Yevroittifoq yetakchilari hammasi xursand: xudoga shukr, Vengriya o‘zimizga qaytdi, deyishyapti. Saylov o‘tishi bilanoq Budapeshtning Ukrainaga yordam masalasidagi pozitsiyasi darhol o‘zgardi”, deydi Kamoliddin Rabbimov. Farhod Karimovning qayd etishicha, tashqi siyosiy vektor o‘zgarishi aniq, lekin Orbanning 16 yillik hokimiyatidan keyin boshqaruv bir zumda o‘zgarib qolishini kutish yaramaydi.
Vengriyada 16 yil hokimiyatda bo‘lgan Viktor Orban saylovlarda mag‘lubiyatga uchradi va muxolifat yetakchisi Peter Mojar g‘alaba qozondi. Kun.uz'ning “Geosiyosat” dasturida ishtirok etgan siyosatshunoslarga ko‘ra, u Orban davridagi tashqi siyosatdan asta-sekin uzoqlashishi kutilmoqda. Mojar u Yevroittifoq bilan yaqinlashadi, shu bilan birga, Rossiya bilan iqtisodiy manfaatli aloqalar ham transformatsiyaga uchraydi.
Yangi yetakchi Ukraina uchun moliyaviy yordamni bloklamasligini e’lon qilib ulgurdi.
“Orban qurgan tizimni o‘zgartirish tez bo‘lmaydi, buning uchun hatto referendumlar talab etilishi mumkin”
Farhod Karimov:
— Peter Mojar saylovoldi chiqishlari va dasturida saylovchilar e’tiborini asosan Viktor Orban olib borgan ichki va tashqi siyosatni tanqid qilish orqali qozondi. Aynan shu tanqidiy yondashuv unga saylovda g‘alaba keltirdi. Shunday ekan, u kelgusida ham shu yo‘nalishni davom ettirishi kutiladi.
Vengriyada ichki va tashqi siyosatda o‘zgarishlar bo‘lishi mumkin, biroq bu jarayon tez kechmaydi. Sababi – Orban 16 yil davomida davlat tizimini ancha mustahkamlab ulgurgan. Uni o‘zgartirish uchun konstitutsion islohotlar, hatto referendumlar talab etilishi mumkin. Shuningdek, Orban shakllantirgan boshqaruv shakli, kadrlar tizimi, harbiy va moliyaviy institutlar hanuz o‘z ta’sirini saqlab qoladi.
Shu bois Mojar hokimiyatga kelishi bilan bu tizimni qisqa muddatda tubdan o‘zgartira olmaydi. Ammo siyosiy pozitsiyalarda ma’lum o‘zgarishlar kuzatiladi. Xususan, Yevropa Ittifoqi bilan yaqinlashuv, Ukraina masalasida muvozanatliroq yondashuv hamda moliyaviy majburiyatlar bo‘yicha pozitsiyaning qayta ko‘rib chiqilishi ehtimoli mavjud.
Mojar saylovoldi chiqishlarida aynan shu yo‘nalishni bir necha bor ta’kidlab, Vengriya siyosatini G‘arb tomon burishga intilishini bildirgan edi. Biroq bu o‘zgarishlar birdaniga yuz bermaydi, buning uchun kamida bir necha yil talab etiladi.
