Namanganda tergovchi va advokat pora bilan ushlandi

Namangan viloyati IIB tergovchisi o‘z ish yurituvidagi jinoyat ishini tugatib yuborish evaziga ishga aloqador bo‘lmagan advokat orqali 40 ming dollar talab qilgan. Ularning har ikkisi tezkor tadbirda qo‘lga olindi.

Foto: DXX

Namanganda tergovchi va advokat pora bilan ushlandi. Bu haqda Davlat xavfsizlik xizmati xabar berdi.

Ma’lum qilinishicha, Namangan viloyati IIB Tergov boshqarmasi tergovchisi o‘zining ish yurituvida bo‘lgan, Chust tumanida yashovchi 20 yoshli shaxsga nisbatan qo‘zg‘atilgan jinoyat ishini uning foydasiga ijobiy hal qilib, tugatib yuborish evaziga ishga aloqador bo‘lmagan advokat orqali 40 ming dollari talab qilgan.

DXX xodimlari tomonidan Chust tumanida tezkor tadbir o‘tkazilgan. Unda advokatlar hay’ati advokati gumonlanuvchining otasidan 40 ming dollar olgan vaqtida ashyoviy dalillar bilan ushlangan.

So‘ngra tezkor tadbir davom ettirilib, advokatdan 30 ming dollar olgan vaqtida tergovchi ham qo‘lga olingan.

Tergovchiga nisbatan Jinoyat kodeksining 210-moddasi (pora olish), advokatga esa 212-moddasi (pora olish-berishda vositachilik qilish) bilan jinoyat ishi qo‘zg‘atilgan. Ularga qamoqqa olish tarzidagi ehtiyot chorasi qo‘llangan.

Avvalroq Qashqadaryoda IIB xodimi pora bilan ushlangandi.