Til sertifikatlari uchun ball va ustamalar tartibi o‘zgardi

Endilikda chet tili fani mavjud bo‘lgan bakalavriat ta’lim yo‘nalishlariga kirishda B1 darajadagi milliy yoki xalqaro tan olingan sertifikatga ega abituriyentlarga mazkur fan bo‘yicha belgilangan maksimal ballning 75 foizi miqdorida ball beriladi. Shuningdek, pedagog xodimlar uchun sertifikatlarga oid ustama va rag‘batlantirish tartibi ham yangilandi.

Sun’iy intellekt yaratgan surat

Adliya vazirligi tomonidan Xorijiy tillar va umumta’lim fanlarini bilish darajasini belgilovchi sertifikatlar ro‘yxatiga o‘zgartirish va qo‘shimchalar kiritish to‘g‘risidagi idoraviy hujjat davlat ro‘yxatidan o‘tkazildi (ro‘yxat raqami 3515-2, 2026 yil 2 iyun).

Yangi tartibga ko‘ra, ingliz tilidan beriladigan TOEFL iBT sertifikatining muvofiqlik darajasi 1–6 ballik tizim asosida belgilanadi.

Shuningdek, bakalavriatning fanlar majmuasida chet tili fani mavjud bo‘lgan ta’lim yo‘nalishlariga qabulda B1 darajadagi milliy yoki xalqaro tan olingan sertifikatga ega abituriyentlarga ushbu fan bo‘yicha maksimal ballning 75 foizi hisoblanadi.

Pedagog xodimlarga ustama to‘lashda ingliz tili bo‘yicha TKT, TESOL, TEFL va TESL sertifikatlarining amal qilish muddati inobatga olinadi.

Kasbiy ta’lim tashkilotlarida xorijiy tilda maxsus fanlarni o‘qituvchi pedagoglarga milliy yoki xalqaro tan olingan B2 darajadagi sertifikat uchun lavozim maoshining 50 foizi, C1 darajadagi sertifikat uchun esa 100 foizi miqdorida har oylik ustama to‘lanadi.

Bundan tashqari, o‘qituvchilarga Digital SAT sertifikatining matematika bo‘limida 750 va undan yuqori ball to‘plagan taqdirda ham ustama belgilanadi.

Umumiy o‘rta ta’lim maktablarida faoliyat yurituvchi musiqa madaniyati va jismoniy tarbiya fanlari o‘qituvchilariga esa B+ va undan yuqori darajadagi sertifikatlar uchun ustama to‘lash tartibi joriy etildi.