Bog‘chadan hovuzgacha: bolakayni o‘limga olib borgan to‘siqsiz yo‘l

Fojiaga olib borgan yo‘l

Kun.uz voqea sodir bo‘lgan hududni ko‘zdan kechirdi. Bog‘cha va qo‘shni 58-maktab – bitta yo‘lning shundoqqina ikki tarafida joylashgan. Muhammadali bog‘chadan chiqqanidan keyin maktab hududiga o‘tib ketgan. Bunga ikki hudud orasidagi beton to‘siqning buzilgan qismi imkon bergan.

Shuningdek, maktab hovlisida favqulodda vaziyatlar uchun tashkil etilgan suv havzasini o‘rab turgan temir panjaraning bir qismi ham mavjud bo‘lmagan. Natijada kichik yoshli bolaning havza hududiga kirishi uchun amalda hech qanday to‘siq qolmagan.

Ayni vaqtda beton to‘siq ham, havza atrofidagi panjaralar ham tiklangan.

Bu esa tabiiy savolni tug‘diradi: agar bu kamchiliklar fojiadan keyin qisqa vaqt ichida bartaraf etilgan bo‘lsa, nega ular oldinroq tuzatilmagan?

Maktab direktori nima deydi?

58-maktab direktori Dilnoza Pirnazarovaning aytishicha, mazkur to‘siq avval ham bir necha marta buzilgan: ayrim fuqarolar devorni qayta-qayta sindirib ketgan, hatto bu holat bo‘yicha ikki kishi ma’muriy javobgarlikka ham tortilgan.

Direktor havzaga suv yaqinda quyilganini aytdi. Uning ta’kidlashicha, Favqulodda vaziyatlar bo‘limi xodimlari havza doimo suv bilan to‘ldirilgan holda saqlanishi kerakligini talab qilib kelgan va bu talab bajarilmagani uchun maktab bir necha bor jarimaga ham tortilgan.

Shundan keyin havzaga suv to‘ldirilgan. Biroq havza atrofidagi xavfsizlik choralari yetarlicha ta’minlanmagan.

Bola bog‘chadan qachon chiqib ketgan?

«Yulduzcha» bog‘chasi mudirasi Mehriniso Qo‘chqorovaning aytishicha, muassasadagi bolalar har kuni turmush o‘rtog‘iga tegishli Damas avtomobilida uylariga tarqatiladi.

Uning so‘zlariga ko‘ra, 5 iyun kuni soat taxminan 16:30 larda avtomobil kelgan va bolalarni chiqarish boshlangan. Shu vaqtda Muhammadali ko‘rinmay qolgan.

Mudiraning aytishicha, tarbiyachilar va boshqa xodimlar darhol qidiruvga chiqqan. Tarbiyachilardan biri maktab hovlisiga o‘tib, havza ustida suzib yurgan bolaning oyoq kiyimini ko‘rgan. Shundan keyin muassasa rahbarining turmush o‘rtog‘i havzaga tushib, bolani suvdan chiqarib olgan.

Qo‘chqorovaga ko‘ra, o‘sha vaqtda Muhammadalida hayot alomatlari bo‘lgan.

Payariq tumani maktabgacha va maktab ta’limi bo‘limi bosh mutaxassisi Fazliddin Dudashevning ma’lum qilishicha, hozirda hodisaga va muassasa faoliyatiga huquqiy baho berish choralari ko‘rilmoqda.

Uning aytishicha, bog‘cha faoliyatini vaqtincha to‘xtatish yoki boshqa qat’iy choralar ko‘rish bo‘yicha mas’ul tashkilotlarga taklif kiritilishi mumkin.

Bosh prokuratura ma’lumotiga ko‘ra, hozirda holat yuzasidan tuman prokuraturasi tomonidan tergovga qadar surishtiruv harakatlari olib borilmoqda.

Bu birinchi holat emas

Muhammadalining o‘limi bilan bog‘liq yana bir tashvishli jihat bor.

Ma’lum bo‘lishicha, taxminan uch oy avval «Yulduzcha» bog‘chasining transporti ishtirokida noxush hodisa ro‘y bergan.

Ota-onalardan birining aytishicha, tarbiyalanuvchi qizaloq uyiga olib kelinganda muassasa avtomobili uni turtib yuborgan. Natijada bola jarohat olib, uzoq vaqt davolangan.

Bog‘chalarda xavfsizlik muammosi

So‘nggi paytlarda bog‘chalarda bolalarning xavfsizligi ta’minlanmayotgani juda ko‘p baxtsiz hodisalarga olib kelmoqda.

E’tiborlisi, 2,5 yashar Muhammadalining o‘limi voqeasida birgina insonning xatosi emas, balki xavfsizlikning bir nechta halqasi bir vaqtning o‘zida uzilganini kuzatish mumkin.

Qayd etish lozim, Muhammadali halok bo‘lishidan bir kun avval Qashqadaryo viloyatining Qamashi tumanida ham bog‘cha bilan bog‘liq fojia sodir bo‘lgandi. U yerda qizaloq muassasa avtomobilida unutib qoldirilgan va vafot etgan.

Ikki kun ichida ikki hududda ikki bola hayotdan ko‘z yumdi. Oxirgi oylarda shunga o‘xshash boshqa holatlar ham ro‘y berdi. Bu esa bog‘chalarda bolalar xavfsizligi borasida jiddiy, tizimli muammolardan darak berayotgandek.