Qoʻshimcha funksionallar
-
Tungi ko‘rinish
Fedorov iste’fosi Ukrainada ommaviy noroziliklarga sabab bo‘ldi
Ukraina poytaxti Kiyevda mudofaa vaziri Mixail Fedorovning iste’fosiga qarshi ommaviy namoyishlar ikkinchi kun ham davom etdi. Namoyishchilar uni lavozimiga qaytarishni talab qilish bilan birga, Ukraina Qurolli kuchlari Bosh qo‘mondoni Aleksandr Sirskiyning iste’fosini ham talab qilmoqda.
17 iyul kuni Kiyev markazida mudofaa vaziri Mixail Fedorovning iste’fosiga qarshi navbatdagi ommaviy aksiyalar bo‘lib o‘tdi. Norozilik namoyishlari avvalgi kun boshlangan bo‘lib, ikkinchi kunga kelib ishtirokchilar soni yanada oshgan.
Ertalabdanoq Ukraina poytaxti markazidagi Ivan Franko maydoniga yuzlab odamlar yig‘ildi. Asosiy aksiya kechqurunga rejalashtirilgan bo‘lsa-da, kun davomida namoyishchilar soni ortib bordi. Kechga yaqin maydon barcha ishtirokchilarni sig‘dira olmay qolgani uchun odamlar atrofdagi ko‘chalarni ham to‘ldirgan.
Namoyish qatnashchilari Mixail Fedorovni yana mudofaa vaziri lavozimiga qaytarishni talab qilar ekan, Ukraina Qurolli kuchlari bosh qo‘mondoni Aleksandr Sirskiyni lavozimidan ozod etish va uning o‘rniga general Mixail Drapatiyni tayinlash chaqiriqlarini ham ilgari surdi.
Aksiya davomida ishtirokchilar turli shiorlarni yangratdi, Ukraina davlat madhiyasi, vatanparvarlik qo‘shiqlari hamda futbol muxlislari orasida mashhur bo‘lgan qo‘shiqlarni kuyladi. Namoyishda Ukraina, Yevropa Ittifoqi hamda Ukraina isyonchilar armiyasi bayroqlari ko‘tarildi.
Fedorovning lavozimdan ozod etilishi Ukraina jamoatchiligida, ayniqsa harbiylar orasida keng muhokamalarga sabab bo‘ldi. Ikkinchi kungi aksiyalarda harbiy libosdagi xizmatchilar va Rossiya–Ukraina urushi qatnashchilari bo‘lgan veteranlar soni ham ko‘paygan.
DW muxbirining so‘zlariga ko‘ra, aksiya ishtirokchisi bo‘lgan harbiylardan biri armiyada qurol-yarog‘ va dronlar taqsimotida adolatsizlik mavjudligini aytgan. Uning fikricha, ayrim bo‘linmalar ehtiyojidan ortiq resurslarga ega bo‘lsa, boshqalari ko‘ngillilar yordamiga muhtoj bo‘lib qolmoqda.
Namoyish qatnashchilari Mixail Fedorovni so‘nggi yillardagi eng samarali mudofaa vazirlaridan biri deb baholab, armiyadagi islohotlar va modernizatsiya jarayonlarini aynan u bilan bog‘lashini ta’kidladi.
Tashkilotchilarning ma’lum qilishicha, talablar bajarilmaguncha norozilik aksiyalari keyingi kunlarda ham davom ettirilishi rejalashtirilgan.
