Andijon viloyatining Xo‘jaobod tumanida bolalarni bog‘chaga olib ketayotgan Tracker YTHga uchragani ma’lum bo‘ldi. Kun.uz sud hujjati bilan tanishdi.
Sud hukmiga ko‘ra, YTH 21 fevral kuni ertalab “Xo‘jaobod-Bobur” avtomobil yo‘lida sodir bo‘lgan. 40 yoshli I.A. (ayol) 21 nafar bolani o‘z boshqaruvidagi Tracker mashinasiga mindirib, xususiy bog‘chaga olib ketayotganda boshqaruvni yo‘qotgan. Oqibatda mashina yo‘l chetidagi beton ustunga borib urilgan.
YTHda 8 nafar bola turli darajada jarohatlangan. Ulardan biri – 6 yoshli qizaloq og‘ir tan jarohati olib, shifoxonaning jonlantirish bo‘limiga yotqizilgan. Ko‘rsatilgan tibbiy yordamga qaramay u oradan 4 kun o‘tib vafot etgan.
Haydovchi ayol suddagi ko‘rsatmasida bolalarni hatto mashina yukxonasiga ham chiqarganini aytgan.
“Chap tomonimdan qandaydir mashina tezlik bilan o‘tdi. Ushbu holatdan qo‘rqib ketib, o‘zim bilmagan holda mashinamni o‘ng tomonga burib yubordim. So‘ng yo‘l chetiga chiqib, boshqaruvni butunlay yo‘qotdim va yoritish ustuniga urildim. Atrofdagilardan yordam so‘rab yig‘lab yubordim. Atrofdagi odamlar meni va bolalarni mashinadan chiqarib, shifoxonaga olib borishdi. Qoidalarga rioya qilmasdan 21 nafar bolani mashinaning old, orqa va “bagaj” qismiga chiqardim. Qilmishimdan pushaymonman”, degan u.
Ayol 2-guruh nogironi ekanini bildirib, suddan yengillik so‘ragan.
JIB Xo‘jaobod tuman sudi hukmi bilan I.A. Jinoyat kodeksining 266-moddasi 2-qismida nazarda tutilgan jinoyatni (transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) sodir qilishda aybli deb topildi.
Unga Jinoyat kodeksining 45 va 57-moddalarini qo‘llagan holda 2 yil mashina boshqarish huquqidan mahrum qilib, 3 yil muddatga uy-joyni tark etishni butunlay taqiqlash tarzidagi ozodlikni cheklash jazosi tayinlandi.
Avvalroq Nurota tumanida 13 nafar bog‘cha bolasini tashib ketayotgan Matiz YTHga uchragan va uni boshqargan ayol vafot etgandi.
