Visual Capitalist tayyorlagan infografikada 2024 yilda eng ko‘p arralangan yog‘och materiallari ishlab chiqargan davlatlar reytingi keltirilgan. Hisob-kitoblar FAO statistikasiga asoslangan.
Ma’lumotlarga ko‘ra, AQSh o‘tgan yili qariyb 76,45 million kub metr (2,7 milliard kub fut) pilomaterial ishlab chiqarib, jahon yetakchiligini saqlab qolgan.
Ikkinchi o‘rinni Xitoy egallagan. Mamlakatda ishlab chiqarish hajmi 59,47 million kub metr (2,1 milliard kub fut)ni tashkil etgan. Keyingi o‘rinlarda Rossiya va Kanada qayd etilgan.
Beshlikni Hindiston yakunlagan bo‘lib, u yerda qariyb 23,98 million kub metr (847 million kub fut) yog‘och materiallari ishlab chiqarilgan.
Mutaxassislar hisob-kitobiga ko‘ra, mazkur besh mamlakat hissasiga jahon pilomateriallari ishlab chiqarishining yarmidan ko‘prog‘i to‘g‘ri keladi. Bu holat ularning boy o‘rmon zaxiralari, rivojlangan yog‘ochni qayta ishlash sanoati hamda qurilish va ishlab chiqarish sohalaridagi yuqori talab bilan izohlanadi.
Yevropa ham jahon yog‘och mahsulotlari bozorida muhim o‘rin tutadi. Qit’adagi eng yirik ishlab chiqaruvchilar Germaniya, Shvetsiya va Finlandiya hisoblanadi. Shvetsiya va Finlandiya boshqariladigan keng o‘rmon maydonlari hamda eksportga yo‘naltirilgan sanoati bilan ajralib turadi. Germaniya esa o‘zining o‘rmon resurslaridan qurilish va qayta ishlash tarmoqlarini ta’minlashda samarali foydalanmoqda.
Shuningdek, Avstriya va Fransiya ham dunyodagi eng yirik 15 ta pilomaterial ishlab chiqaruvchi mamlakat qatoriga kiradi. Bu Yevropa mamlakatlarining global yog‘och mahsulotlari ta’minotida muhim o‘rin tutishini yana bir bor tasdiqlaydi.
Hisobotda qayd etilishicha, AQSh hozircha yetakchilikni saqlab kelayotgan bo‘lsa-da, eng yuqori o‘sish sur’atlarini Xitoy namoyon etmoqda. 2004 yildan buyon mamlakatda pilomateriallar ishlab chiqarish hajmi uch baravardan ko‘proq oshgan. Bunga jadal urbanizatsiya, turar-joy va tijorat qurilishiga bo‘lgan talabning o‘sishi, shuningdek, infratuzilma loyihalarining kengayishi turtki bo‘lgan.
Bugungi kunda Xitoy nafaqat yirik ishlab chiqaruvchi, balki dunyodagi eng katta yog‘och mahsulotlari qayta ishlovchisi va iste’molchilaridan biri ham hisoblanadi. Mamlakatda mebel, qurilish materiallari va sanoatda qo‘llanadigan muhandislik yog‘och mahsulotlarining keng turlari ishlab chiqariladi.
