Prezident Administratsiyasi to‘g‘risidagi qonun imzolandi. Tadbirkorlikni litsenziyasiz boshlashga vaqtinchalik ruxsat beriladigan bo‘ldi. Bolaga familiya berish tartibi o‘zgardi. Ekstremizm ta’rifiga aniqlik kiritiladi va jazo qayta ko‘rib chiqiladi. Toshkentda uy-joy boshqaruvi bilan bog‘liq yirik firibgarlik fosh etildi. Kunning muhim yangiliklari bilan tanishtiramiz.
Prezident Administratsiyasi to‘g‘risidagi qonun imzolandi
«O‘zbekiston Respublikasi Prezidenti Administratsiyasi to‘g‘risida»gi konstitutsiyaviy qonun imzolandi. Qonun bilan Administratsiyaning amaldagi vakolatlari doirasida Prezident faoliyatini ta’minlashning konstitutsiyaviy mexanizmlari huquqiy jihatdan rasmiylashtirildi.
Administratsiyaning asosiy vazifalari sifatida Prezidentning konstitutsiyaviy vakolatlari amalga oshirilishini tashkiliy, huquqiy va tahliliy ta’minlash; farmon, qaror va farmoyishlari loyihalarini hamda topshiriqlarini tayyorlash, ularning ijrosini tashkil etish, nazoratini olib borish hamda ularni amalga oshirishga ko‘maklashish; mamlakatni ijtimoiy-iqtisodiy va ijtimoiy-siyosiy rivojlantirishga oid yangi tashabbuslarini ishlab chiqish va boshqalar belgilandi.
Administratsiya prezidentga bevosita bo‘ysunuvchi davlat organlari faoliyatini muvofiqlashtiradi, ularni takomillashtirish bo‘yicha takliflar tayyorlaydi va prezidentga kiritadi.
Tadbirkorlikni litsenziyasiz boshlashga vaqtinchalik ruxsat beriladi
Qonunchilikka kiritilgan qo‘shimchalar bilan litsenziya yoki ruxsat etish xususiyatiga ega hujjatni «Biznesga litsenziyasiz kirish» maxsus rejimi doirasida olish tartibi belgilandi.
Unga ko‘ra, talabgor maxsus elektron tizim yoki Yagona interaktiv davlat xizmatlari portali orqali vakolatli organni xabardor qilgan holda, tegishli faoliyatni litsenziya yoki ruxsat etish xususiyatiga ega hujjatsiz boshlashi mumkin. Maxsus rejimning amal qilish muddati 3 oy etib belgilangan. Ushbu davrda talabgor muayyan faoliyatni litsenziyasiz yoki ruxsat beruvchi hujjatsiz amalga oshirgani uchun javobgarlikka tortilmaydi.
Biroq tadbirkor 3 oy davomida o‘z faoliyatini litsenziya yoki ruxsat berish talablari va shartlariga muvofiqlashtirishi lozim.
Bolaga familiya berish tartibi o‘zgardi
Yangi qonun bilan Oila kodeksining 69-moddasiga o‘zgartirish kiritildi va otaning ismini bolaga familiya sifatida berilishi mumkin bo‘ldi.
Shuningdek, ota yoki ona tomonidan milliy an’analarga muvofiq bobosining ismi bo‘yicha ham familiya berishga ruxsat etildi.
Avval amaldagi Oila kodeksida otaning ismini bolaga familiya sifatida berish nazarda tutilmagan edi.
Ekstremizm ta’rifiga aniqlik kiritiladi va jazo qayta ko‘rib chiqiladi
Senat ma’qullagan Qonun bilan Jinoyat kodeksi va Ma’muriy javobgarlik to‘g‘risidagi kodeksga o‘zgartirishlar kiritilib, ekstremizm, separatizm va aqidaparastlik g‘oyalari bilan yo‘g‘rilgan materiallarni tayyorlash, saqlash va tarqatish bilan bog‘liq huquqbuzarliklar uchun javobgarlik choralari liberallashtirilmoqda.
Xususan, bunday harakatlarni birinchi marta sodir etganlik uchun jinoiy javobgarlik bekor qilinib, ma’muriy javobgarlik kiritilmoqda, takroran sodir etilgan taqdirdagina jinoiy javobgarlik yuzaga kelishi qayd etilmoqda.
Shuningdek, «Ekstremizmga qarshi kurashish to‘g‘risida»gi Qonun takomillashtirilib, ekstremizm tushunchasiga aniq ta’rif berilmoqda. Shuningdek, qonunchilikdagi «diniy ekstremizm» atamasi «ekstremizm» atamasi bilan almashtirilib, huquqni qo‘llash amaliyotida yagona huquqiy yondashuv ta’minlanmoqda.
Qonun prezident tomonidan imzolanganidan keyin kuchga kiradi.
Toshkentda uy-joy boshqaruvi bilan bog‘liq yirik firibgarlik fosh etildi
Toshkentning Uchtepa tumanida o‘zini ko‘p qavatli uy boshqaruv organi rahbari sifatida ko‘rsatib, xonadon egalarining yirik miqdordagi mablag‘ini firibgarlik yo‘li bilan qo‘lga kiritganlik holati fosh etildi.
Bosh prokuratura huzuridagi Departamentning Uchtepa tumani bo‘limi tomonidan tergovga qadar tekshiruv o‘tkazilganida A.B. va M.B. o‘zini go‘yoki Vatanparvar mahallasi hududida joylashgan 29-sonli uyning boshqaruv organi rahbari sifatida ko‘rsatib kelgani aniqlangan. Ma’lum qilinishicha, ular mazkur uydagi xonadonlarda yashovchi fuqarolarning ishonchiga kirib, jami 574,6 mln so‘m mablag‘ni firibgarlik yo‘li bilan qo‘lga kiritgan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atildi va tergov harakatlari olib borilmoqda.
