Birinchi pulli avtomobil yo‘li - Urganch–Xiva trassasida yo‘l haqi to‘lash tizimi hozircha sinov rejimida ishlamoqda. To‘lov tizimi 25-avgustdan to‘liq ishga tushirilishi rejalashtirilgan.
Xabar qilinishicha, yengil avtomobil uchun to‘liq yo‘nalish bo‘yicha yo‘l haqi 25 ming so‘m, 28 km uzunlikdagi qisqa yo‘nalish uchun esa 20 ming so‘mni tashkil etadi.
Trassaning o‘tkazuvchanlik quvvati kuniga 30 mingdan ortiq avtomobilni tashkil etadi. Yo‘l haqi avtomobillarni to‘xtatmasdan elektron shaklda undiriladi.
Transport oqimi va to‘lovlar SI asosidagi tizim orqali boshqariladi, elektron hamyonni to‘ldirish va avtomatik to‘lov qilish mumkin.
“Trassada 40–130 km/soat tezlikka ruxsat berilgan. To‘xtash, qayrilib olish, piyodalar, mopedlar, ot-aravalar va tirkamali avtomobillar harakati taqiqlangan”, deyiladi xabarda.
Prezident Shavkat Mirziyoyev 18-avgust kuni Xorazm viloyatiga tashrifi davomida yangi «Urganch – Xiva» pulli avtomobil yo‘li bilan tanishgandi.
