«Xavfsiz va sogʻlom yurt» tezkor-profilaktik tadbirlari doirasida Davlat xavfsizlik xizmatining Surxondaryo viloyati boʻyicha boshqarmasi xodimlari ichki ishlar va bojxona organlari bilan hamkorlikda bir qator tezkor tadbirlar oʻtkazdi.
Jumladan, Denov tumanida yashovchi, 1980-yilda tugʻilgan shaxsning xonadoni koʻzdan kechirilganda 1 kg 7 gramm opiy va 998 gramm gashish moddalari aniqlangan.
Maʼlum qilinishicha, ushbu shaxs avval ham giyohvandlik vositalari savdosi bilan bogʻliq jinoyat uchun sudlangan boʻlib, aniqlangan narkotik moddalarni keyinchalik sotish maqsadida saqlab kelgan.
Denov tumanida qayd etilgan yana bir holatda 1986 va 1966-yillarda tugʻilgan ikki nafar fuqaro 491 gramm gashishni shartli xaridorga 85 mln soʻmga sotayotgan vaqtda ashyoviy dalillar bilan ushlangan. Ular ham avval giyohvandlik vositalari savdosi bilan bogʻliq jinoyatlar uchun sudlangani aytilmoqda.
Uchinchi holat Termiz shahrida qayd etilgan. 2003-yilda tugʻilgan Afgʻoniston fuqarosi «Termiz xalqaro savdo markazi» hududida 506 gramm opiy moddasini shartli xaridorga 2,5 ming AQSH dollariga sotayotgan vaqtida qoʻlga olingan.
Tezkor tadbir davomida aniqlanishicha, gumonlanuvchi giyohvandlik vositasini qoʻshni davlatdan yashirin ravishda olib kirish uchun oʻz ichki organidan «jonli konteyner» sifatida foydalangan.
Qayd etilgan uchta holatda jami 3 kilogrammdan ortiq opiy va gashish moddalari muomaladan olingan.
Hozirda barcha holatlar yuzasidan gumonlanuvchilarga nisbatan jinoyat ishlari qoʻzgʻatilib, tergov harakatlari olib borilmoqda.
