Andijon viloyatida yana bir oilada toʻrt egizak dunyoga keldi, deya xabar bermoqda Sogʻliqni saqlash vazirligi.
20-avgust kuni Andijon tumanida yashovchi Dildora Ahmedova koʻp homilalik tashxisi bilan Respublika ixtisoslashtirilgan ona va bola salomatligi ilmiy-amaliy tibbiyot markazining Andijon viloyat filialiga qabul qilingan.
Seshanba kuni ertalab ayolda muddatidan avval kesarcha kesish amaliyoti bajarilgan. Malakali akusher-ginekolog, neonatolog va reanimatologlar ishtirokida oʻtkazilgan tugʻuruq jarayoni muvaffaqiyatli yakunlangan.
Dunyoga kelgan chaqaloqlarning uch nafari qiz va bir nafari oʻgʻil bola boʻlib, ular 1534−1840 gramm ogʻirlikda tugʻilgan.
Hozirda chaqaloqlar va ularning onasi shifokorlar nazoratida boʻlib turibdi, deyiladi xabarda.
Eslatib oʻtamiz, shu yil iyul oyi boshida ham Andijon shahrida besh egizak (3 qiz, 2 oʻgʻil) dunyoga kelgandi.
