Ukraina prezidenti Volodimir Zelenskiy Ruslan Kravchenkoni mamlakat bosh prokurori lavozimidan chetlatdi. Bu davlat rahbarining 2026-yil 14-sentabrdagi farmonidan maʼlum boʻldi.
Ushbu qaror «Harbiy holatning huquqiy rejimi toʻgʻrisida»gi Ukraina Qonunining 11-moddasi ikkinchi qismiga muvofiq qabul qilindi. Unga koʻra, davlat rahbari harbiy holat davrida tayinlash va lavozimdan ozod etish oʻz vakolatiga kiradigan mansabdor shaxsni egallab turgan lavozimidan chetlatish hamda tegishli davr uchun uning vazifalarini bajarishni boshqa shaxsga yuklash toʻgʻrisida qaror qabul qilishi mumkin.
«Karfagen» ishi
Avvalroq Ukraina Milliy antikorrupsiya byurosi bosh prokuror ofisi mansabdor shaxsi boshchiligidagi jinoiy guruhni fosh etish boʻyicha maxsus amaliyot oʻtkazgan edi. Taʼkidlanishicha, ushbu guruh firibgarlik bilan shugʻullanuvchi koll-markazlar tarmogʻini himoyalash va mulkni legallashtirishga aloqador boʻlishi mumkin. Bu ish «Karfagen» nomini olgan.
14-sentabr kuni Kravchenko Parijga (Fransiya) besh kunlik xizmat safarini mustaqil ravishda rasmiylashtirgani maʼlum boʻldi. U yerda Yevropa Kengashi Parlament Assambleyasi yigʻilishida ishtirok etishi kerak edi.
Bundan avval Kravchenko Ukraina Milliy antikorrupsiya byurosi rahbariga hamda Ixtisoslashtirilgan aksilkorrupsiya prokuraturasi (SAP) rahbariga yaqin shaxsga nisbatan shubha bildirilgani haqidagi hujjatni imzolaganini maʼlum qilgandi.
