Ukraina prezidenti Volodimir Zelenskiy Donald Tramp bilan Nyu-Yorkda uchrashishni rejalashtirayotganini maʼlum qildi. U bu haqda 20-sentabr, yakshanba kuni AQSH prezidenti bilan telefon orqali muloqotidan keyin Telegram kanalida yozdi.
Zelenskiyning soʻzlariga koʻra, ikki mamlakat rahbarlari Nyu-Yorkda shaxsan uchrashishga kelishib olgan. Ukraina prezidenti bu muzokara tinchlik jarayoni nuqtai nazaridan muhim ahamiyat kasb etishi va «koʻp narsani oʻzgartirishi mumkin»ligini taʼkidladi.
Biroq Zelenskiy uchrashuv aynan qaysi kuni oʻtkazilishini ochiqlamadi. Donald Tramp ham xabar eʼlon qilingan vaqtga qadar Nyu-Yorkda Ukraina prezidenti bilan uchrashish rejasini rasman tasdiqlamagan.
Telefon muloqoti davomida Zelenskiy AQSH prezidentining maxsus vakillari Stiven Uitkoff va Jared Kushnerning Kiyevga yaqinda amalga oshirgan tashrifi uchun Trampga minnatdorlik bildirgan.
Ukraina prezidentining aytishicha, Amerika vakillari bilan uchrashuvda muhim masalalar batafsil muhokama qilingan va ular Ukrainadagi vaziyatni bevosita koʻrish imkoniga ega boʻlgan.
Zelenskiy Ukrainadagi urushni tinch yoʻl bilan tugatish boʻyicha muzokaralar Kiyev uchun birinchi darajali ustuvor yoʻnalish ekanini taʼkidladi.
Shuningdek, Ukraina rahbari Rossiyaga nisbatan sanksiya bosimini kuchaytirish imkonini beruvchi «Lindsi Grem qonuni»ni imzolagani uchun Trampga minnatdorlik bildirdi.
Zelenskiyning maʼlum qilishicha, Kiyevda vaziyatni yumshatish va xavfsizlikning asosiy masalalari boʻyicha bir qator takliflar mavjud. Ular energetika va oziq-ovqat xavfsizligi hamda insonlar hayotini himoya qilishga doir choralarni qamrab oladi.
«Biz Amerika jamoasi bilan birgalikda ishlayapmiz va haqiqatan ham jiddiy qadamlar tashlashga tayyormiz», - dedi Ukraina prezidenti.
Uitkoff va Kushner 6-sentabr kuni Kiyevda Zelenskiy bilan uchrashgan edi. Bu Donald Trampning ikkinchi prezidentlik muddati boshlanganidan keyin uning maxsus vakillarining Ukrainaga ilk tashrifi boʻldi.
Amerika vakillari Kiyevga kelishidan bir kun oldin, 5-sentabrda Moskvada Rossiya prezidenti Vladimir Putin bilan uch soatlik muzokara oʻtkazgan.
