Ish joyidagi tazyiq va zoʻravonlikka qarshi yangi dastur qabul qilindi
Prezidentning «Mehnat sohasida xavfsiz va hurmatga asoslangan ish muhitini taʼminlash chora-tadbirlari toʻgʻrisida»gi qarori qabul qilindi. Unga muvofiq, davlat idoralari va tashkilotlarida xavfsiz va hurmatga asoslangan ish muhitini taʼminlash dasturi bosqichma-bosqich joriy etiladi.
Jumladan, 1-dekabrgacha Boshqaruv samaradorligi agentligining axborot tizimlarida davlat organlari va tashkilotlari uchun «Xavfsiz va hurmatga asoslangan ish muhiti» axborot portali ishga tushiriladi. Portal orqali ish joyidagi tazyiq va zoʻravonlik holati boʻyicha onlayn murojaat yuborish mumkin boʻladi.
Tazyiq va zoʻravonlikka oid murojaatlarni tekshirish, dalillarni toʻplash, xulosa tayyorlash, axborot almashish va muloqot jarayonlari ham portal orqali amalga oshiriladi. Oʻtkazilgan tekshiruvlar, ularning natijalari, koʻrilgan choralar va ushbu qarorlarning oʻzgartirilishiga oid maʼlumotlar portalda saqlanadi. Ularni yoʻq qilishga yoʻl qoʻyilmaydi.
Buxoroning tarixiy qismida baʼzi transport vositalari harakati cheklanadi
Buxoro shahrining tarixiy qismida 1-oktabrdan boshlab yoʻlovchi tashishga moʻljallanmagan vositalar harakati cheklanadi. Bu haqda Buxoro shahri hokimining qarorida belgilandi.
Jumladan, Ark qoʻrgʻonidan Poyi kalon ansambli, Haqiqat koʻchasi boʻylab, Labi-hovuz ansambligacha boʻlgan hududda qonunchilik talablariga muvofiq boʻlmagan yoʻlovchi tashish va individual harakatlanish vositalari, jumladan elektroskuter, riksha, moped, 4 gʻildirakli velosiped, elektrosamokat, karting, ot va tuyada harakatlanishini cheklashga oid choralar koʻriladi.
Bunga tartibsiz harakatlanishlar xorijiy va mahalliy sayyohlarning xavfsizligiga tahdidlar, piyodalarning sogʻligʻiga shikast yetkazilishi bilan bogʻliq holatlar sabab boʻlgani aytilmoqda.
Fargʻonada avtomobil boshqargan oʻsmirning otasiga chora koʻrildi
Fargʻona viloyati, Soʻx tumanida 5-sinf oʻquvchisi koʻchada avtomobil haydayotgani aks etgan video ijtimoiy tarmoqlarda tarqaldi.
Viloyat IIB Yoʻl harakati xavfsizligi boshqarmasiga koʻra, transport vositasining egasi aniqlanib, jarima maydonchasiga qoʻyilgan. Holat yuzasidan unga nisbatan Maʼmuriy javobgarlik toʻgʻrisidagi kodeksning 47-moddasi (Bolalarni tarbiyalash va ularga taʼlim berish borasidagi majburiyatlarni bajarmaslik) hamda 135-moddasi (Yoʻl harakati qoidalarida nazarda tutilgan hujjatlari boʻlmagan shaxslarning transport vositalarini boshqarishi) 2-qismi bilan maʼmuriy bayonnoma rasmiylashtirilgan.
Endi ota farzandining qilmishi uchun jarima toʻlashi mumkin. U bilan profilaktik suhbat ham oʻtkazilgan.
Toshkent metrosi bir haftada ikkinchi bor rekordni yangiladi
Toshkent metropolitenida bir kunda tashilgan yoʻlovchilar soni boʻyicha navbatdagi rekord qayd etildi. 21-sentabr kuni metro xizmatlaridan jami 1 181 581 nafar yoʻlovchi foydalandi, bu yangi rekord hisoblanadi. Bundan avvalgi eng yuqori natija 14-sentabr kuni qayd etilgan edi. Oʻsha kuni Toshkent metrosi 1 165 550 nafar yoʻlovchiga xizmat koʻrsatgan. Yangi koʻrsatkich avvalgi rekorddan 16 031 nafarga koʻp boʻldi.
Taʼkidlanishicha, metropoliten mutaxassislari olib borayotgan monitoring va tahlillar yoʻlovchilar oqimining oʻsish tendensiyasi davom etayotganini koʻrsatgan.
Mavjud koʻrsatkichlar asosida oktabr oyida metroning kundalik yoʻlovchilari soni 1,2 million nafarga yetishi kutilmoqda.
Pora olib, oqlangan YPX xodimi yana pora bilan qoʻlga tushdi
Surxondaryoda muqaddam pora olganlikda ayblanib, oqlangan YPX xodimi yana pora olib, 5 yilga qamaldi.
Sud hukmiga koʻra, F.I. IIB tizimida ishlab, 2014-yil iyulda pora olish jinoyatida ayblanib, 6 yilga ozodlikdan mahrum qilingan. Keyinchalik Oliy sud tomonidan oqlangan. Shundan soʻng IIB tizimiga ishga tiklangan hamda 2023-yil may oyidan Surxondaryo viloyat IIB YHXB katta inspektori lavozimida ishlab kelgan. U 2026-yil 2-mart kuni paxta ortib ketayotgan yuk mashinalarni maskandan oʻtkazmasdan, toʻxtatib qoʻygan. Oʻtkazish evaziga har biridan 100 ming soʻm talab qilgan. Tezkor tadbirda kelishilgan 4,1 mln soʻmdan 4 mln soʻmini olgan vaqtida ushlangan.
Sud unga 5 yil ozodlikdan mahrum qilish jazosini tayinladi.
