Yaponiyalik tadqiqotchilar mahsulotlarni qaysi tartibda isteʼmol qilish organizmning glyukozaga javobini qanday oʻzgartirishini oʻrgangan. Ilmiy ish Diabetes jurnalida eʼlon qilingan.
Tajribada bir guruh sichqonga avval zaytun moyi, 15 daqiqadan keyin glyukoza berilgan. Ikkinchi guruhda esa ketma-ketlik teskari boʻlgan.
Olimlar yogʻning oldin berilishi oshqozonning boʻshashini sekinlashtirishini kuzatgan. Natijada glyukoza ingichka ichakka asta-sekin oʻtgan va qondagi qand darajasi keskin koʻtarilmagan.
Tahlillar bu jarayon faqat ovqatning oshqozonda uzoqroq qolishi bilan cheklanmasligini koʻrsatgan. Zaytun moyi ichakdagi GLP-1 va GIP gormonlari ajralishini kuchaytirgan, shuningdek, bosh miyani hazm aʼzolari bilan bogʻlovchi adashgan nervning signal yoʻllarini faollashtirgan.
Tadqiqotda glyukagon gormonining roli ham eʼtibor tortgan. Odatda qondagi qandni oshirish bilan bogʻliq bu gormon mazkur tajriba sharoitida GLP-1 bilan birgalikda glyukozaning keskin koʻtarilishini cheklashga yordam bergan.
Mualliflarga koʻra, aniqlangan mexanizm mahsulotlarni isteʼmol qilish ketma-ketligi qand darajasiga qanday taʼsir koʻrsatishini tushunishga yordam beradi.
Biroq sichqonlardagi natija odamlarda ham aynan shunday samara boʻlishini anglatmaydi. Insonlar uchun taʼsir darajasi, maqbul miqdor va xavfsizlikni baholashga qaratilgan klinik sinovlar hali oʻtkazilishi kerak. Shu bois bu ish zaytun moyini diabet davosi yoki dorilar oʻrnini bosuvchi vosita sifatida tavsiya qilishga asos boʻlmaydi.
