Xitoy «O‘zbekiston-Qirg‘iziston-Xitoy» yangi temir yo‘lining bir nechta variantini taklif qildi

Transport vazirligida Xitoy Xalq Respublikasining islohotlar va rivojlanish bo‘yicha davlat qo‘mitasining chet el kapitali va xorijiy investitsiyalar departamenti bosh direktori o‘rinbosari Chjen Chiping boshchiligidagi delegatsiya a'zolari bilan uchrashuv bo‘lib o‘tdi.

Uchrashuv davomida “O‘zbekiston-Qirg‘iziston-Xitoy” temir yo‘l loyihasini amalga oshirish yuzasidan muhokamalar o‘tkazilgan. Xitoy tomoni mazkur temir yo‘l liniyasi o‘tishi mumkin bo‘lgan hududlar bo‘yicha o‘z takliflarni bildirdi. 

Tomonlar ushbu temir yo‘l liniyasi nafaqat bir davlat uchun balki butun mintaqa rivoji va taraqqiyotida muhim ahamiyatga ega ekanligini ta'kidlab o‘tishdi. Shuningdek, mamlakatlar o‘rtasida multimodal tashuvlar hajmini ko‘paytirish, hamkorlikda avtomobil tashuvlarini faol rivojlantirish masalasi muhokama qilindi.

Eslatib o‘tamiz, yangi temir yo‘l Xitoydan Yevropa va Yaqin Sharq mamlakatlariga eng qisqa yo‘l hisoblanadi. Mavjud yo‘nalishlarga nisbatan masofa 900 km.ga, yuklarni yetkazib berish muddati 7-8 kunga qisqaradi. Mutaxassislar fikriga ko‘ra, yiliga kamida 5 million tonna yuk tashish yo‘lni qurish uchun ketgan xarajatlarni to‘liq qoplaydi.