DSQ vakili moliyaviy jarimani hududlar imkoniyatidan kelib chiqib belgilash taklifiga munosabat bildirdi

27 aprel kuni AOKAdagi matbuot anjumanida tadbirkor ijtimoiy tarmoqlar orqali moliyaviy jarima miqdorini hududlar imkoniyatidan kelib chiqib belgilash taklifini bildirdi.

Murojaatchining so‘zlariga ko‘ra, soliq organlari tomonidan korxonalarga qo‘llaniladigan moliyaviy jarima miqdori bir xil belgilangan. «Jarima miqdorini hududlar imkoniyatidan kelib chiqib diversifikatsiya qilish kerakligi to‘g‘ri bo‘lmaydimi, axir Toshkent shahridagi korxonalar bilan chekka hududdagi korxonalar imkoniyati bir xil emas», deydi u.

DSQ tadbirkorlikni qo‘llab-quvvatlash bo‘limi boshlig‘i Bahodir Abibullayevning ta'kidlashicha, har yili moliyaviy jarima miqdori soliq siyosatini belgilaganda Moliya vazirligi bilan birgalikda qabul qilinib, Oliy Majlis tomonidan belgilanadi.

«Soliq kodeksida belgilangan moliyaviy jarima miqdori hozircha bir xil – besh million so‘m etib belgilangan. Agar takliflar bo‘ladigan bo‘lsa, qayta ko‘rib chiqilishi mumkin. To‘g‘ri, hamma hududning ham moliyaviy imkoniyati bir xil emas, ammo har bir hududga belgilangan moliyaviy jarima miqdorini ajratishning o‘zi noto‘g‘ri bo‘lgani sababli jarima bir xil etib belgilangan», – dedi u.

Soliq qo‘mitasi vakili Shavkat Turdiyevning qo‘shimcha qilishicha, qonunbuzilish holati sayyor tekshiruv jarayonida aniqlansa, 5 million so‘m jarima ko‘zda tutilgan, biroq soliq to‘lovchi qonunbuzilish holatini 10 kun ichida bartaraf qilsa, jarimaning yarmini, ya'ni 2,5 million so‘m to‘laydi.

Avvalroq, ijtimoiy soliq bo‘yicha qonunchilikka yangilik kiritilgani ma'lum qilingandi.