Huquqbuzarga MJtKning 111-moddasida ko‘rsatilgan huquqbuzarlikni sodir etgani tufayli ma’muriy bayonnoma rasmiylashtirilgan.
Ijtimoiy tarmoqlarda Jizzaxdagi sement zavodining maxsus kiyimini kiyib olgan shaxs tomonidan itlar tiriklayin kuydirilayotgani haqidagi xabarlar tarqaldi. Hodisa yuzasidan Jizzax viloyati IIB axborot xizmati munosabat bildirdi.
Unda yozilishicha, Zafarobod tumani IIB xodimlari tomonidan xabar yuzasidan surishtiruv ishlari olib borilganda, itni tiriklayin kuydirgan shaxs Xitoyda tug‘ilgan, Zafarobod tumani “Chimqo‘rg‘on” QFYda joylashgan “Xuaxin” o‘zbek-xitoy qo‘shma korxonasida mexanizator bo‘lib ishlovchi Man Ming ekanligi aniqlangan.
Qayd etilishicha, holat yuzasidan Zafarobod tuman IIB hodimlari tomonidan hayvonlarga shafqatsiz munosabatda bo‘lgan Man Mingga nisbatan Ma’muriy javobgarlik to‘g‘risidagi kodeksning 111-moddasida (Hayvonlarga nisbatan shafqatsiz munosabatda bo‘lish) ko‘rsatilgan huquqbuzarlikni sodir etgani tufayli ma’muriy bayonnoma rasmiylashtirilgan.
Avvalroq, Qashqadaryo viloyati Kitob tumanida joylashgan sement zavodida xitoylik ishchilar eshak so‘yib iste’mol qilgani haqida xabarlar tarqalgan edi. Tuman hokimligi axborot xizmati hodisa Kitob tumanida sodir bo‘lmaganini bildirgandi.
