Prezident administratsiyasining Nazorat inspeksiyasiga yangi rahbar tayinlandi

Bugun, 24 avgust kuni O‘zbekiston Prezidenti administratsiyasi rahbari Sardor Umrzoqov boshchiligida prezident tomonidan yangi tayinlangan kadrlar tanishtiruvi bo‘yicha yig‘ilish bo‘lib o‘tdi.

Kun.uz manbasining xabar berishicha, Administratsiya nazorat inspeksiyasi boshlig‘i lavozimiga Saidlaziz Saidasilovich Saidkarimov tayinlangan. U bunga qadar Hisob palatasi raisi o‘rinbosari bo‘lib ishlab kelayotgandi.

Uning o‘rniga esa Prezident administratsiyasi sho‘’ba mudiri O‘tkir Jumanov Hisob palatasi raisi o‘rinbosari bo‘lgan.

Tanqidiy ruhda o‘tgan yig‘ilishda inspeksiyaning yangi boshlig‘iga prezident topshiriqlari, ijro intizomi, qaror va farmonlar ijrosini ta’minlash, vazifalariga sovuqqonlik bilan yondashayotgan rahbar xodimlarga jazo berish, ularni ishdan ozod etish va qonuniy javobgarlikkacha tortish yuzasidan takliflar kiritish vakolatlari berilgan.

Saidlaziz Saidkarimov 1982 yil Toshkent viloyatida tug‘ilgan. 2002 yil O‘zbekiston Milliy universitetini huquqshunoslik mutaxassisligi bo‘yicha tamomlagan.

U 2002-2009 yillarda Sirdaryo viloyati prokuraturasi tizimida turli vazifalarda ishlagan. 2009-2018 yillarda Bosh prokuratura boshqarma prokurori, katta prokurori, boshqarma boshlig‘i o‘rinbosari, boshqarma boshlig‘i lavozimlarida faoliyat olib borgan.

2018 yil fevraldan 2020 yil sentabrgacha bosh prokuror o‘rinbosari lavozimida ishlagan, shundan so‘ng Hisob palatasi raisiga o‘rinbosar etib tayinlangan edi.