Bosh vazir o‘rinbosari tadbirkorlar bilan uchrashuvda gazdan uzilgan issiqxonalarni tarmoqqa ulash haqida topshiriq berdi

Hozircha gaz, keyin baribir muqobil energiya

“Energetika vazirligida bo‘lib o‘tgan uchrashuvda Bosh vazir o‘rinbosari Jamshid Xo‘jayev issiqxonalarni gaz tarmog‘iga ulash bo‘yicha mutasaddilarga topshiriq berdi. Shu bilan birga, bosqichma-bosqich muqobil energiyaga o‘tish uchun harakatni boshlashimiz kerakligi ham tushuntirildi. Birdaniga muqobil energiyaga o‘tilmaydigan bo‘ldi. Hukumat vakillari bilan bu masalani birdaniga emas, bosqichma-bosqich hal qilishga kelishib oldik.

Shuningdek, uchrashuvda anchadan beri tayyor turgan, ammo imzolanmagan prezident qarori loyihasi masalasi ham ko‘tarildi. Ushbu hujjat loyihasida issiqxonalar faoliyati bilan bog‘liq tizimli muammolarni hal qilishga qaratilgan takliflar ham aks ettiriladigan bo‘ldi. Energetika vazirligidan chiqib Qishloq xo‘jaligi vazirligi huzuridagi Bog‘dorchilik va issiqxona xo‘jaligini rivojlantirish agentligiga keldik va prezident qarori loyihasini o‘qib chiqib, takliflarimizni yozib qoldirdik. Uchrashuv qishloq xo‘jaligi vaziri Aziz Voitov rahbarligida o‘tkazildi”, deydi Kun.uz muxbiri bilan uchrashgan tadbirkorlardan biri.

“Uchrashuvda faoliyatimizga daxldor barcha vazirlik va idoralarning, tijorat banklarining rahbarlari shaxsan ishtirok etishdi. Bosh vazir o‘rinbosari bizni qiynayotgan barcha muammolarni diqqat bilan eshitdi. Ularning yechimlari bo‘yicha takliflarini bildirdi.

Xususan, energetika vaziriga kuch-qish mavsumida issiqxonalarni to‘liq gaz bilan ta’minlash haqida topshiriq berildi. Faqat gaz uchun qarzdorlik bo‘lmasligi so‘raldi. Oldindan to‘lov asosida ishlatishga ruxsat berildi. Qolgan masalalarga ham birma-bir yechim topilishi aytildi. Prezident qarori loyihasi qabul qilinsa boshqa muammolarimiz ham hal bo‘lishi kutilmoqda.

Uchrashuvda erishilgan eng katta natija shu bo‘ldi aslida. Energetika vazirligidan chiqishimiz bilan Samarqanddagi hamkasblarimiz gazchilar kelib issiqxonalarni qayta gaz tarmog‘iga ulab berishgani haqida xabar berishdi. Buxoroda gazga ulanishga ruxsat berilgani haqida xabar berganimizdan so‘ng tadbirkorlar qo‘y so‘yib bayramni boshlab yuborishdi”, deydi tahririyatimiz bilan aloqada bo‘lib turgan boshqa bir issiqxonachi.

Kun.uz manbasining aytishicha, Bog‘dorchilik va issiqxona xo‘jaligini rivojlantirish agentligidagi yig‘ilishda barchadan muammolar va ularning yechimi bo‘yicha takliflar so‘rab olinganidan so‘ng besh nafar tadbirkor Prezident Administratsiyasi rahbari Sardor Umrzoqov bilan uchrashuvga taklif etilgan.

Gazdan uzilgan issiqxonalar

Respublika bo‘ylab issiqxonalarni gazdan uzish boshlangani, tadbirkorlar gaz ta’minoti korxonalarining bu harakatlaridan norozi bo‘layotgani haqida avval xabar bergandik.

“Hududgazta’minot” AJ tomonidan joylardagi gaz ta’minoti filiallariga yuborilgan topshiriq xatida issiqxona xo‘jaliklarini tabiiy gazga muqobil bo‘lgan import ko‘mir yoki boshqa turdagi yoqilg‘i bilan ta’minlash, kuz-qish mavsumida tabiiy gaz yetkazib berilishi kafolatlanmagan ulgurji iste’molchilarni rasman ogohlantirgan holda bosqichma-bosqich tabiiy gaz yetkazib borilishini to‘xtatish haqida so‘z boradi.

Issiqxona egalari 2022–2023 yilgi kuz-qish mavsumida aholi, ijtimoiy soha obektlarini uzluksiz bir maromda tabiiy gaz bilan ta’minlash maqsadida tabiiy gazdan muqobil yoqilg‘iga o‘tish kerakligi haqida ogohlantirish olishgan. Gaz ta’minoti korxonalari issiqxonani isitish uchun gazdan boshqa yoqilg‘iga o‘tilganda yuzaga kelishi mumkin bo‘lgan barcha salbiy oqibatlar uchun javobgarlikni zimmasidan soqit qilib, buning uchun issiqxona egalari javobgar bo‘lishini eslatgan.

Biroq tadbirkorlar muqobil yoqilg‘ilarning hech biri (ko‘mir, solyarka, o‘tin) gaz o‘rnini bosmasligi, natijada yuzlab gektar maydonlarda yetishtirilayotgan minglab tonna hosil xavf ostida qolganidan yozg‘irishmoqda. Hududlardagi mas’ul organlar ularni qiynayotgan muammolarni hal qilish bo‘yicha jo‘yali yechim taklif etolmagani ortidan O‘zbekiston bo‘yicha issiqxona faoliyati bilan shug‘ullanayotgan shaxslar Bosh vazir Abdulla Aripov, Prezident Administratsiyasi rahbari Sardor Umrzoqov qabuliga kirish uchun poytaxtda to‘planishga qaror qilishgan.

25 oktabr, seshanba kuni issiqxonalari gazdan uzilgan tadbirkorlar norozilik bildirib, Toshkentda to‘plangan. Gazeta.uz’ning xabar berishicha, respublikaning turli hududlaridan kelgan o‘nlab issiqxonachilar dastlab Qishloq xo‘jaligi vazirligi huzuridagi Bog‘dorchilik va issiqxona xo‘jaligini rivojlantirish agentligi oldida to‘plangan. Shundan so‘ng ular Prezident Administratsiya rahbari Sardor Umrzoqov bilan ko‘rishishga uringan, biroq ular Vazirlar Mahkamasiga yo‘naltirilgan.

Vazirlar Mahkamasining mas’ullari O‘zbekiston tarixi davlat muzeyining faollar zalida tadbirkorlar bilan uchrashuv o‘tkazgan. Muloqot chog‘ida issiqxona egalarining muammolar haqida fikrlari, takliflari tinglangan. Vazirlar Mahkamasi va «O‘ztransgaz» kompaniyasi vakillari ushbu masala yuzasidan bosh vazirga taklif tayyorlab, kiritilishini, tadbirkorlar bilan yana bir marta uchrashuv bo‘lishini ma’lum qilishgandi.

Profilaktik suhbatlar

Gazdan uzilishi ortidan ommaviy axborot vositalariga intervyu bergan, shuningdek, muammoni hal qilish maqsadida ko‘pchilik bo‘lib Vazirlar Mahkamasi, Prezident Administratsiyasi borish g‘oyasini ilgari surgan issiqxonachilar o‘zlari yashayotgan hududdagi ichki ishlar idoralariga chaqirilgan. Ular bir necha soat ushlab o‘tirilgani, tushuntirish ishlaridan so‘ng qo‘yib yuborilgani aytilmoqda.

Respublikaning turli hududlarida yashovchi tadbirkorlar Telegramʼdagi guruhda 25 sentabr kuni Toshkentda to‘planish, hukumat darajasidagi rahbarlar bilan uchrashib, qanday qilib bo‘lmasin muammoga yechim topish haqidagi chaqiriqlari ortidan o‘zlari yashayotgan tumandagi ichki ishlar organlariga chaqirtirilgan. U yerda tadbirkorlar bilan profilaktik suhbat o‘tkazilgan va ulardan noqonuniy guruhlarga qo‘shilmaslik, ruxsat olinmagan mitinglarda qatnashmaslik haqida tilxat yozdirib olingan.

Ismini oshkor qilmaslik sharti bilan O‘zbekistonning turli hududlarida yashovchi ayrim tadbirkorlar dushanba kuni kechqurun profilaktika inspektorlari uylariga kelib, ularni idoraga olib ketishgani, u yerda Telegram messenjerida tashkil etilgan va respublika bo‘ylab issiqxonachilar to‘plangan guruhdagi yozgan fikrlari, xususan, issiqxonalarni gazdan uzib qo‘yib ko‘pchilikni xonavayron qilayotgan mas’ullar sha’niga aytgan tanqidiy fikrlari, bunga qarshi ommaviy norozilik bildirishga chaqiriqlari uchun Jinoyat kodeksining 244-moddasi (Ommaviy tartibsizliklar) bilan jinoiy javobgarlikka tortilishlari mumkinligi haqida ogohlantirilganini aytishmoqda.

Biroq hozircha hech bir tadbirkorga poytaxtga kelib rasmiylarga norozilik bildirishga uringani uchun ma’muriy yoki jinoiy ish ochilgani haqida Kun.uz’da ma’lumot yo‘q. Manbalarga ko‘ra, Telegram messenjerida tashkil etilgan guruh o‘chirib yuborilgan.