Farg‘onada 11 yoshli qizning zo‘rlab o‘ldirilgani yuzasidan uch o‘smirga hukm o‘qildi

2024 yil 15 yanvar kuni jinoyat ishlari bo‘yicha Farg‘ona shahar sudida 11 yoshli qizning zo‘rlab o‘ldirib ketilishiga doir jinoyat ishi yuzasidan sud hukmi o‘qildi. Bu haqda Farg‘ona viloyati sudi xabar berdi.

Ma’lum qilinishicha, sud hukmi bilan voyaga yetmagan sudlanuvchi M.S.ga Jinoyat kodeksi 25, 97-moddasi (qasddan odam o‘ldirish) 2-qismining «v, z, o» bandlari, 118-moddasi 4-qismi (o‘n to‘rt yoshga to‘lmagan shaxsning nomusiga tegish), 119-moddasining 4-qismi bilan (o‘n to‘rt yoshga to‘lmagan shaxsga nisbatan jinsiy ehtiyojni zo‘rlik ishlatib g‘ayritabiiy usulda qondirish) ushbu kodeksning 85-moddasi hamda 59-moddasining 3-qismi tartibida 14 yil muddatga ozodlikdan mahrum qilish jazosi tayinlangan.

Voyaga yetmagan sudlanuvchi D.A.ga Jinoyat kodeksi 97-moddasi 2-qismining «v, z, o» bandlari, 118-moddasining 4-qismi va 119-moddasining 4-qismi bilan ushbu kodeksning 85-moddasi hamda 59-moddasining 3-qismi tartibida 13 yil muddatga ozodlikdan mahrum qilish jazosi berilgan.

Shuningdek, voyaga yetmagan sudlanuvchi B.X.ga Jinoyat kodeksi 241-moddasining 2-qismi bilan (jinoyat haqida xabar bermaslik yoki uni yashirish) kodeksning 62, 84−1-moddalari tartibida 2 yil muddatga ozodlikni cheklash jazosi tayinlangan.

Hukmdan norozi taraflar tegishli muddatda Farg‘ona viloyat sudiga apellyatsiya tartibida shikoyat berish huquqi tushuntirilgan. Jinoyat ishi yopiq sud majlisida ko‘rilgani bois ish tafsiloti oshkor etilmagan.

Eslatib o‘tamiz, 2023 yilning 20 iyul kuni Farg‘ona shahri Yangi Asr ko‘chasida joylashgan qurilishi tugallanmagan bino yonidan 11 yoshli qizning murdasi zo‘rlash alomatlari bilan topilgandi. Holat yuzasidan Jinoyat kodeksining 97 (qasddan odam o‘ldirish), 118 (nomusga tegish) va 119 (jinsiy ehtiyojni zo‘rlik ishlatib g‘ayritabiiy usulda qondirish) moddalari bilan jinoyat ishi qo‘zg‘atilgan edi.

Keyinchalik Farg‘ona shahridagi 16-umumiy o‘rta ta’lim maktabining 11-sinf o‘quvchisi qizning uyiga kelib, onasi uni chaqirayotganini aytgan va uydan olib chiqib ketgani oydinlashgandi.

2023 yil 28 iyul kuni Farg‘onada ichki ishlar tizimi bo‘yicha videoselektor o‘tkazgan prezident ushbu voqeani ham tilga olib, bu holat vaziyat qanchalik og‘irligini ko‘rsatib turganini ta’kidlab o‘tgandi.